Home
  By Author [ A  B  C  D  E  F  G  H  I  J  K  L  M  N  O  P  Q  R  S  T  U  V  W  X  Y  Z |  Other Symbols ]
  By Title [ A  B  C  D  E  F  G  H  I  J  K  L  M  N  O  P  Q  R  S  T  U  V  W  X  Y  Z |  Other Symbols ]
  By Language
all Classics books content using ISYS

Download this book: [ ASCII | PDF ]

Look for this book on Amazon


We have new books nearly every day.
If you would like a news letter once a week or once a month
fill out this form and we will give you a summary of the books for that week or month by email.

Title: Conversion des Sauvages qui ont  esté baptizés en la Nouvelle France, cette année 1610
Author: L'escarbot, Marc
Language: French
As this book started as an ASCII text book there are no pictures available.


*** Start of this LibraryBlog Digital Book "Conversion des Sauvages qui ont  esté baptizés en la Nouvelle France, cette année 1610" ***


                             CONVERSION
                            DES SAUVAGES
                        QUI ONT ESTÉ BAPTISÉS
                        EN LA NOUVELLE FRANCE,
                          cette année 1610.

                        _AVEC UN BREF RECIT
                         du voyage du Sieur_
                           DE POUTRINCOURT.

[Illustration]

                               A PARIS

              Chez Jean Millot, tenant sa boutique sur
               les degrez de la grand'Salle du Palais.
               _______________________________________

                       _Avec Privilege du Roy._

[Illustration]

                             A LA ROYNE

_MADAME,

Dieu m'ayant fait naitre amateur de ma nation & zelateur de sa gloire,
je ne puis moins, que de luy faire part de ce qui la touche, & qui sans
doute l'époinçonnera quand elle entendra que le nom de Jesus-Christ est
annoncé és terres d'outre mer qui portent le nom de France. Mais
particulierement cela regarde vôtre Majesté, laquelle sur ces nouvelles
a eu un temoignage du grand contentement qu'elle en avoit. La chrétienté
doit ceci au courage & à la pieté du Sieur de Poutrincourt, qui ne peut
vivre oisif parmi la tranquillité en laquelle nous vivons par le
benefice du feu Roy vôtre Epoux. Mais (Madame) si vous desirez bien-tot
voir cet oeuvre avancé, il faut que vous y mettiez la main. Donnez luy
des ailes pour voler sur les eaux, & penetrer si avant dans les terres
de delà, que jusques à l'extremité où l'Occident se joint à l'Orient,
tout lieu retentisse du nom de la France. Je sçay qu'il ne manque de
volonté & fidelité au service du Roy et de vôtre Majesté, pour faire
(apres ce qui est de Dieu) que vous soyés obei par tout le monde. Et
pour mon regard en tout ce que j'ay jamais travaillé, je me suis efforcé
de bien meriter du Roy & du public, ausquels j'ai dedié mes labeurs.
S'il m'en arrive quelque fruit, je le dedieray volontiers, & tout ce que
Dieu m'a donné d'industrie, à l'accroissement de cette entreprise & à ce
qui regardera le bien de vôtre service. Cependant ayez (MADAME) agreable
ce petit discours evangelique (c'est à dire portant bonnes nouvelles)
que publie à la France souz vôtre bon plaisir,_

MADAME,

_De vôtre Majesté_

Le tres-humble, tres-obéissant,
& tres-fidele serviteur & sujet
MARC LESCARBOT.



                  _Extraict du Privilege du Roy._
                  _______________________________

PAR grace & privilege du Roy, il est permis à Jean Millot Marchant
Libraire en la ville de Paris, d'imprimer, ou faire imprimer, vendre &
distribuer par tout nostre Royaume tant de fois qu'il luy plaira, en
telle forme ou caractere que bon luy semblera, un livre intitulé LA
CONVERSION DES SAUVAGES composé par MARC LESCARBOT Advocat en la Cour de
Parlement. Et ce jusques au temps & terme de six ans finis & accomplis,
à compter du jour que le dit livre sera achevé d'imprimer. Pendant
lequel temps defences sont faictes à tous Imprimeurs, Libraires, &
autres de quelque estat, qualité, ou conditions qu'ils soient, de non
imprimer, vendre, contrefaire, ou alterer le dit livre, ou aucune partie
d'iceluy, sur peine de confiscation des exemplaires, & de quinze cens
livres d'amende appliquable moitié à nous, & moitié aux pauvres de
l'hotel Dieu de cette ville de Paris,& despens dommages, & interests
dudit exposant: Nonobstant toute clameur de Haro, Charte, Normande,
Privileges, Lettres ou autres appellations & oppositions formées à ce
contraire faictes ou à faire. Donné à Paris le neufiesme jour de
Septembre l'an de grace 1610. Et de nostre regne le premier.

Par le Roy en son Conseil.

Signé, BRIGARD.

[Illustration]



                         _LA CONVERSION DES
                   Sauvages qui ont esté baptisez
                    en la Nouvelle-France, cette
                             année 1610._


LA parole immuable de nôtre Sauveur Jesus-Christ nous temoigne par
l'orne de sainct Matthieu que _L'Evangile du royaume des cieux sera
annoncé par tout le monde, pour estre en temoignage à toutes nations,
avant que la consommation vienne._ Nous sçavons par les histoires que la
voix des Apôtres eclaté par tout le monde de deça dés il y a plusieurs
siecles passez, quoy qu'aujourd'hui les royaumes Chrétiens en soient la
moindre partie. Mais quant au nouveau monde decouvert depuis environ
six-vingts ans, nous n'avons aucun vestige que la parole de Dieu y ait
onques esté annoncée avant ces derniers temps, si ce n'est que nous
voulions adjouter quelque foy à ce que Jehan de Leri rapporte, que comme
il racontoit un jour aux Bresiliens les grandes merveilles de Dieu en la
creation du monde, & mysteres de nôtre redemption, un vieillart lui dit
qu'il avoit oui dire à son grand pere qu'autrefois un homme barbu (or
les Bresiliens ne le sont point) estoit venu vers eux, & leur avoit dit
choses semblables: mais qu'on ne le voulut point écouter, & depuis
s'estoient entre-tuez & mangez les uns les autres. Quant aux autres
nations dela quelques uns ont bien quelque sourde nouvelle du deluge, &
de l'immortalité des ames, ensemble de la beatitude des bien-vivans
apres cette vie, mais ils peuvent avoir retenu cette obscure doctrine de
main en main par tradition depuis le cataclisme universel qui avint au
temps de Noé. Reste donc à déplorer la miserable condition de ces
peuples qui occupent une terre si grande, que le monde de deça ne vient
en comparaison avec elle, si nous comprenons la terre qui est outre le
détroit de Magellan dite, _Terra del fugo_, tant en son étenduë vers la
Chine, & le Japan, que vers la Nouvelle Guinée: comme aussi celle qui
est outre la grande riviere de Canada, qui s'estend vers l'Orient & est
baignée de la grande mer Occidentale. Toutes lesquelles contrées sont en
une miserable ignorance, & n'y a point d'apparence qu'elles aient onques
eu le vent de l'Evangile, sinon qu'en ce dernier siecle l'Hespagnol
parmi la cruauté & l'avarice y a apporté quelque lumiere de la religion
Chrétienne. Mais cela est su peu de chose, qu'on n'en peut pas faire si
grand estat qu'il pourroit sembler, d'autant que par la confession méme
de ceux qui en ont écrit les histoires ils ont preque tué tous les
naturels du païs, & en fait nombre un certain historien, de plus de
vingt millions, dés il y a soixante ans. L'Anglois depuis vingt-cinq ans
a pris pié en une terre qui git entre la Floride, & le païs des
Armouchiquois, laquelle terre a esté appelée Virginie, en l'honneur de
la défuncte Royne d'Angleterre. Mais cette nation fait ses affaires si
secretement, que peu de gens en sçavent de nouvelles certaines. Peu
apres que j'eu publié mon Histoire de la Nouvelle France on fit un
embarquement de huit cens hommes pour y envoyer. Il n'est point mention
qu'ils se soient lavé les mains au sang de ces peuples. En quoy ils ne
sont ni à louer, ni à blamer: car il n'y a aucune loy, ni aucun
pretexte, qui permette de tuer qui que ce soit, & méme ceux des biens
desquelz nous nous emparons. Mais ils sont à priser s'ils montrent à ces
pauvres ignorans le chemin de salut par la vraye & non fardée doctrine
Evangelique. Quant à nos François je me suis allez plaint en madite
Histoire de la poltronnerie du temps d'aujourd'huy,& du peu de zele que
nous avons soit à redresser ces pauvres errans, soit à faire que le nom
de Dieu soit coneu exalté & glorifié en ces terres d'outre-mer, où
jamais il ne le fut. Et toutefois nous voulons que cela porte le nom de
France,nom tant auguste et venerable, que nous ne pouvons sans honte
nous glorifier d'une France que n'est point Chrétienne. Je sçay qu'il ne
manque pas de gens de bonne volonté pour y aller. Mais pourquoy
l'Eglise, qui possede tant de biens; mais pourquoy les Grands, qui font
tant de depenses superflues,ne financent-ilz quelque chose pour
l'execution d'un si sainct oeuvre? Deux Gentils-hommes pleins de courage
en ces derniers temps se sont trouvez zelés à ceci. Les Sieurs de Monts,
& de Poutrincourt, lesquels à leurs dépens se sont enervés, & ont fait
plus que leurs forces ne pouvoient porter. L'un et l'autre ont continué
jusques à présent leurs voyages. Mais l'un a esté deceu par deux fois, &
est tombé en grand interest pour s'estre rendu trop credule aux paroles
de quelques uns. Or d'autant que les dernieres nouvelles que nous avons
de nôtre Nouvelle-France viennent de la part du Sieur de Poutrincourt,
nous dirons ici ce qui est de son fait: & avois juste sujet d'exalter
son courage, entant que ne pouvant vivre parmi la tourbe des hommes
oisifs, dont nous nous n'abondons que trop; & voyant nôtre France comme
languir au repos d'un calme ennuieux aux hommes de travail: apres avoir
en mille occasion fait preuve de sa valeur depuis vingt quatre ans en
ça; il a voulu coroner ses labeurs vrayement Herculéens par la cause de
Dieu, pour laquelle il employe ses moyens & ses forces, & va hazardant
sa vie pour accroitre le nombre des citoyens des cieux, & amener à la
bergerie de Jesus-Christ nôtre souverain Pasteur, les brebis egarées,
lesquelles il seroit bien-seant aux Prelats de l'Eglise d'aller
recuillir (du moins contribuer à cet effect) puis qu'ils en ont le
moyen. Mais avec combien de travaux s'est-il employé jusques ici à cela?
Voici la troisieme fois qu'il passe le grand Ocean pour parvenir à ce
but. La premiere année se passa avec le sieur de Monts à chercher une
demeure propre & un port asseuré pour la retraite des vaisseaux & des
hommes. Ce qui ne succeda pas bien. La seconde année fut employée à la
mesme chose; & lors il estoit en France. En la troisieme nous fimes
epreuve de la terre, laquelle nous rendit abondamment le fruict de nôtre
culture: Cette année icy voyant par une mauvaise experience que les
hommes sont trompeurs, il ne s'est plus voulu attendre à autre qu'à
luy-méme, & s'est mis en mer le 26 Février, ayant eu temps fort
contraire en sa navigation, laquelle a esté plus longue dont j'aye
jamais ouï parler. Certes la nôtre nous fut fort ennuieuse il y a trois
ans, ayant est vagabons l'espace de deux mois & demi sur la mer avant
qu'arriver au Port Royal. Mais en cette-ci ils ont esté trois mois
entiers. De sorte qu'un indiscret se seroit mutiné jusques à faire de
mauvaises conspirations: toutesfois la benignité du dit Sieur de
Poutrincourt & le respect du lieu où il demeuroit, à Paris, lui ont
servi de bouclier pour luy garantir la vie. La premiere côte où territ
iceluy Sieur de Poutrincourt fut au port au Mouton. De là parmi les
brouillars qui sont fort frequens le long de l'Eté en cette mer, il se
trouva en quelques perils, principalement vers le Cap de Sable, où son
vaisseau pensa toucher sur les brisans. Depuis voulant gaigner le Port
Royal, il fut porté par la violence des vents quarante lieuës par-dela,
c'est à sçavoir à la riviere de Norombega tant celebrée & fabuleusement
décrite par les Geographes & Historiens, ainsi que j'ay monstré en
madite Histoire, là où se pourra voir cette navigation par la Table
geographique que j'y ai mise. De-là il vint à la riviere sainct Jehan
qui est vis à vis du Port Royal pardela la Bay Françoise, où il trouva
un navire de S. Malo, qui troquoit avec les Sauvages du païs. Et là il
eut plainte d'un Capitaine Sauvage qu'un dudit navire lui avoit ravi sa
femme, & en abusoit dont ledit Sieur fut informer, & print celui là
prisonnier, & le navire aussi. Mais il laissa aller ledit navire & les
matelots se contentant de garder la malfaiteur: lequel neantmoins
s'evada dans une chaloupe & se retira avec les Sauvages, les detournant
de l'amitié des François, comme nous dirons ci-apres. En fin arrivés
audit Port Royal il ne se peut dire avec combien de joye ces pauvres
peuples receurent ledit Sieur & sa compagnie. Et de verité le sujet de
cette joye estoit d'autant plus grand qu'ils n'avoient plus d'esperance
de voir les François habiter aupres d'eux, desquels ils avaient ressenti
les courtoisies lors que nous y estions, dont se voyans privés, aussi
pleuroient-ils à chaudes larmes quand nous partimes de là il y a trois
ans. En ce Port Royal est la demeure dudict sieur de Poutrincourt, le
plus beau sejour que Dieu ait formé sur la terre, remparé d'un rang de
12 ou 15 lieuës de montagnes du côté du Nort, sur lesquelles bat le
Soleil tout le jour: & de cotaux au côté du Su, ou Midi: lequel au reste
peut contenir vingt mille vaisseaux en asseurance, ayant vingt brasses
de profond à son entrée, une lieuë & demi de large, & quatre de long
jusques à une ile qui a une lieuë Françoise de circuit: dans lequel j'ay
veu quelquefois à l'aise noüer une moyenne Baleine, qui venoit avec le
flot à huict heures au matin par chacun jour. Au reste dans ce port se
peche en la saison grande quantité de harens, d'eplans (ou eperlans)
sardines, bars, moruës, loups-marins, & autres poissons: & quant aux
coquillages on y recueille force houmars, crappes, palourdes, coques,
moules, escargots & chataignes de mer. Mais qui voudra aller au dessus
du flot de la mer il pechera en la riviere force esturgeons & saumons, à
la deffaicte desquels il y a un singulier plaisir. Or pour reprendre
nôtre fil, le Sieur de Poutrincourt arrivé là a trouvé ses batimens tout
entiers sans que les Sauvages (ainsi a-on appellé ces peuples là jusques
à maintenant) y eussent touché en aucune façon, ny méme aux meubles
qu'on y avoit laissé. Et soucieux de leurs vieux amis ils demandoient
comme un chacun d'eux se portoit, les nommant particulierement par leurs
noms communs, & demandans pourquoy tels & tels n'y estoient retournez.
Ceci demontre une grande debonnaireté en ce peuple, lequel aussi ayant
en nous reconnu toute humanité, ne nous fuit point, comme il fait
l'Hespagnol en tout ce grand monde nouveau. Et consequemment par une
douceur & courtoisie, qui leur est aussi familiere qu'à nous, il est
aisé de les faire plier à tout ce que l'ou voudra, & particulierement
pour ce qui touche le point de la Religion, de laquelle nous leur avions
baillé de bonnes impressions lors que nous estions aupres d'eux, & ne
desiroient pas mieux que de se ranger souz la banniere de Jesus-Christ:
à quoy ils eussent esté receuz dés lors, si nous eussions eu un pié
ferme en la terre. Mais comme nous pensions continuer, avint que le
sieur de Monts ne pouvant plus fournir à la depense, & le Roy ne
l'assistant point, il fut contraint de revoquer tous ceux qui estoient
pardelà, lesquels n'avoient porté les choses necessaires à une plus
longue demeure. Ainsi c'eust esté temerité & folie de conferer le
baptéme à ceux qu'il eust fallu par apres abandonner, & leur donner
sujet de retourner à leur vomissement. Mais maintenant que c'est à bon
escient, & que ledit sieur de Poutrincourt fait pardelà sa demeure
actuelle, il est loisible de leur imprimer le charactere Chrétien sur le
front & en l'ame, apres les avoir instruit és principaux articles de
nôtre Foy. Ce qu'a eu soin de faire ledit Sieur, sachant ce que dit
l'Apôtre, que _celuy qui s'approche de Dieu doibt croire que Dieu est:_
& apres cette croyance, peu à peu on vient aux choses qui sont plus
eloignées du sens commun, comme de croire que d'un rien Dieu ait fait
toutes choses, qu'il se soit fait homme, qu'il soit nay d'une Vierge,
qu'il ait voulu mourir pour l'homme, &c. Et d'autant que les hommes
Ecclesiastics qui ont esté portés pardelà ne sont encore instruits en la
langue de ces peuples, le dit Sieur a pris la peine de les instruire &
les faire instruire par l'organe de son fils ainé jeune Gentilhomme qui
entend & parle fort bien ladite langue, & qui semble estre né pour leur
ouvrir le chemin des cieux. Les hommes qui sont au Port Royal, & terres
adjacentes tirant vers la Terre-neuve, s'appellent Souriquois, & ont
leur langue propre. Mais passée le Baye Françoise, qui a environ 40
lieuës de profond dans les terres, & 10 ou 12 lieuës de large, les
hommes de l'autre part s'appellent Etechemins, & plus loin sont les
Armouchiquois peuple distingué de langage de ceux-ci, & lequel est
heureux en quantité de belles vignes & gros raisins, s'il sçavoit
conoitre l'utilité de ce fruit, lequel (ainsi que nos vieux Gaullois) il
pense estre poison. Il a aussi de la chanve excellente que la nature lui
donne, laquelle en beauté & bonté passe de beaucoup la nôtre: & outre ce
le Sassafras, force chenes, noyers, pruniers, chataigniers, & autres
fruits qui ne sont venus à notre conoissance. Quant au Port Royal je
veux confesser qu'il n'y a pas tant de fruits: & neantmoins la terre y
est plantureuse pour y esperer tout ce que la France Gaulloise nous
produit. Tous ces peuples se gouvernent par Capitaines qu'ils appellent
Sagamos, mot qui est pris és Indes Orientales en méme signification,
ainsi que j'ay leu en l'histoire de Maffeus,& lequel j'estime venir du
mot Hebrieu _Sagan_, qui signifie Grand Prince, selon Rabbi David, &
quelquefois celui qui tient le second lieu apres le souverain Pontife.
En la version ordinaire de la Bible il est pris pour le Magistrat &
neantmoins là méme les interpretes Hebrieux le tournent Prince. Et de
fait nous lisons dans Berose que Noé fut appellé Saga tant pour ce qu'il
estoit grand Prince que pour ce qu'il avoit enseigné la Theologie, & les
ceremonies du service divin avec beaucoup de secrets des choses
natureles, aux Scytes Armeniens, que les anciens Cosmographes
appellerent Sages du nom de Noé. Et paraventure pour cette méme
consideration ont est appellés nos Tectosages, qui sont les Tolosains.
Car ce bon pere restaurateur du monde vint en Italie, & envoya repeupler
les Gaulles apres le Deluge, donnant son nom de Gaullois (car Xenophon
dit qu'il fut aussi appellé de ce nom) à ceux qu'il y envoya, par ce
qu'il avoit esté echappé des eaux. Et n'est pas inconvenient que
lui-méme n'ait imposé le nom aux Tectosages. Revenons à nôtre mot de
Sagamos lequel est le tiltre d'honneur des Capitaines en ces Terres
neuves dont nous parlons. Au port Royal le Capitaine, ou Sagamos dudit
lieu s'appelle en son nom Membertou. Il est àgé de cent ans pour le
moins, & peut naturellement vivre encore plus de cinquante. Il a sous
soy plusieurs familles, ausquelles il commande, non point avec tant
d'authorité que fait nôtre Roy sur ses sujets, mais pour haranguer,
donner conseil, marcher à la guerre, faire raison à celui qui reçoit
quelque injure, & choses semblables. Il ne met point d'impost sur le
peuple. Mais s'il y a de la chasse il en a la part sans qu'il soit tenu
d'y aller. Vray est qu'on lui fait quelquefois des presens de peaux de
Castors, ou autre chose, quand il est employé pour la guerison de
quelque malade, ou pour interroger son dæmon (qu'il appelle _Aoutem_)
afin d'avoir nouvelle de quelque chose future, ou absente: car chaque
village, ou compagnie de Sauvages, ayant un _Aoutmoin_, c'est à dire
Devin, qui fait cet office, Membertou est celui qui de grande ancienneté
à prattiqué cela entre ceux parmi lesquels il a conversé. Si bien qu'il
est en credit pardessus tous les autres Sagamos du païs, aiant dés sa
jeunesse esté grand Capitaine, & parmi cela exercé l'office de Devin &
de Medecin, qui sont les trois choses plus efficaces à obliger les
hommes, & à se rendre necessaire en ceste vie humaine. Or ce Membertou
aujourd'huy par la grace de Dieu est Chrétien avec toute sa famille,
aiant esté baptizé, & vingt autres apres lui, le jour sainct Jehan
dernier 24 Juin. J'en ay lettres dudit Sieur de Poutrincourt en datte du
unzieme jour de Juillet ensuivant. Ledit Membertou a esté nommé du nom
de nôtre feu bon Roy HENRY IIII & son fils ainé du nom de Monseigneur le
Dauphin aujourd'huy nôtre Roy LOUIS XIII que Dieu benie. Et ainsi
consequemment la femme de Membertou a esté nommée MARIE du nom de la
Royne Regente, & à sa fille a esté imposé le nom de la Royne MARGUERITE.
Le second fils de Membertou dit Auctaudin fut nommé PAUL du nom de nôtre
sainct Pere le Pape de Rome. La fille du susdict Louis eut nom CHRISTINE
en l'honneur de Madame la soeur ainée du Roy. Et consequemment à chacun
fut imposé le nom de quelque illustre, ou notable personnage de delâ.
Plusieurs autres Sauvages estoient lors allez cabanner ailleurs (comme
c'est leur coutume de se disperser par bendes quand l'esté est venu)
lors de ces solennitez de regeneration Chrétienne, lesquels nous
estimons estre aujourd'huy enrollés en la famille de Dieu par le méme
lavement du sainct bapteme. Mais le diable, qui jamais ne dort, en ceste
occurence ici a témoigné la jalousie qu'il avoit du salut annoncé à ce
peuple, & de voir que le nom de Dieu fust glorifié en cette terre: ayant
suscité un mauvais François, non François, mais Turc: non Turc, mais
Athée, pour detourner du sentier du salut plusieurs Sauvages, qui
estoient Chrétiens en leur ame & de volonté dés il y a trois ans: entre
autres un Sagamos nommé Chkoudun homme de grand credit, duquel j'ay fait
honorable mention en mon Histoire de La Nouvelle-France, par ce que je
j'ay veu sur tous autres aymer les François, & qu'il admiroit nos
inventions au pris de leur ignorance: mémes que s'estant quelquefois
trouvé aux remontrances Chrétiennes qui se faisoient par-delà à noz
François par chacun Dimanche, il s'y rendoit attentif, encores qu'il n'y
entendist rien: & davantage avoit pendu devant sa poitrine le signe de
la Croix, lequel il faisoit aussi porter à ses domestics & avoit à nôtre
imitation planté une grande Croix en la place de son village dit
_Oigoudi_, sur le port de la riviere sainct Jehan, à dix lieuës du port
Royal. Or cet homme avec les autres, a esté détourné d'estre Chrétien
par l'avarice maudite de ce mauvais François que j'ay touché ci dessus,
lequel je ne veux nommer pour cette heure pour l'amour & reverence que
je porte à son pere mais avec protestation de l'eterniser s'il ne
s'amende. Celui-là di-je, pour arracher quelques Castors de ce Sagamos
Chkoudun, l'alla en Juin dernier suborner, pares s'estre evadé des mains
dudit Sieur de Poutrincourt, disant que tout ce qu'icelui Poutrincourt
leur disoit de Dieu n'estoit rien qui vaille, qu'il ne le falloit point
croire, & que c'estoit un abuseur, & qu'il les feroit mourir pour avoir
leurs Castors. Je laisse beaucoup de mechans discours qu'il peut avoir
adjouté à cela. S'il estoit de la Religion de ceux qui se disent
Reformez je l'excuserait aucunement: mais il montre bien qu'il n'est ni
de l'une, ni de l'autre. Ce Sagamos pouvoit estant Chrétien en rendre
bon nombre semblables à lui, à son imitation. Mais je veux esperer, ou
plustot croire pour certain qu'il ne demeurera plus gueres long temps en
cet erreur, & que ledit Sieur aura trouvé moyen de l'attirer (avec
beaucoup d'autres) pres de soy, pour luy imprimer derechef les vives
persuasions dont il lui avoit autrefois touché l'ame en ma presence. Car
l'esprit de Dieu est puissant pour faire tomber sur ce champ une
nouvelle rousée, qui fera regermer ce que la grele a desseché & abattu.
Dieu vueille par sa grace conduire le tout en sorte que la chose
reüssisse à sa gloire & à l'edification de ce peuple, pour lequel tous
Chrétiens doivent faire continuelles prieres à sa divine bonté, à ce
qu'il lui plaise confirmer & avancer l'oeuvre qu'il lui a pleu susciter
en ce temps pour l'exaltation de son nom, & le salut de ses creatures.

Il y a pardela des hommes d'Eglise de bon sçavoir que le seul zele de la
Religion y a porté, lesquels ne manqueront de faire tout ce que la pieté
requerra en ce regard. Or quant à present il n'est pas besoin de ces
Docteurs sublimes qui peuvent estre plus utiles pardeça à combattre les
vices & les heresies. Joint qu'il y a certaine sorte de gens desquels on
ne se peut pas bien asseurer faisans métier de censurer tout ce qui ne
vient à leurs maximes, & voulans commander par tout. Il suffit d'estre
veillé au dehors sans avoir de ces epilogueurs qui considerent tous les
mouvemens de vôtre corps & de vôtre coeur pour en faire registres,
desquels les plus grands Roys méme ne se peuvent defendre. Et puis, que
serviroient pardela tant de grans de cette sorte, quant à present, si ce
n'est qu'ils voulussent s'addonner à la culture de la terre? Car ce
n'est pas tout que d'aller là. Il faut considerer ce que l'on y fera y
estant arrivé. Pour ce qui est de la demeure du Sieur de Poutrincourt,
il s'est fourni au depart de ce qui lui estoit necessaire. Mais s'il
prenoit envie à quelques gens de bien d'y avancer l'Evangile, je seroy
d'avis qu'ils fissent cinq ou six bendes, avec chacun un navire bien
equippé, & qu'ils allassent planter des colonies en diverses places de
ces quartiers là, comme à Tadoussac, Gachepé, Campseau, La Héve,
Ougoudi, Saincte Croix, Pemptegoet, Kinibeki, & autres endroits où sont
les assemblées de Sauvages, lesquels il faut que le temps ameine à la
Religion Chrétienne si ce n'est qu'un grand Pere de famille tel que le
Roy en vueille avoir la gloire totale, & face habiter ces lieux. Car d'y
penser vivre à leur mode j'estime cela estre hors de nôtre pouvoir. Et
pour le montrer, leur façon de vivre est telle, que depuis la premiere
terre (qui est la Terre-neuve) jusques aux Armouchiquois, qui sont pres
de trois cens lieuës, les hommes vivent vagabons, sans labourage,
n'estans jamais plus de cinq ou six semaines en un lieu. Pline a fait
mention de certains peuples dits Ichtyophages, c'est à dire Mangeurs de
poissons, vivans de cela. Ceux ci sont tout de méme les trois parts de
l'année. Car venant le Printemps ils se divisent par troupes sur les
rives de mer jusques à l'Hiver, lequel venant, par ce que le poisson se
retire au fond des grandes eaux salées, ilz cherchent les lacs & ombres
des bois, où ilz pechent les Castors, dont ilz vivent, & d'autres
chasses, comme Ellan, Caribous, Cerfs, & autres animaux moindres que
ceux-là. Et neantmoins quelquefois en eté méme ilz ne saissent point de
chasser; & d'ailleurs ont infinie quantité d'oyseaux en certaines iles
és mois de May, Juin, Juillet & Aoust. Quant à leur coucher, une peau
etendue sur la terre leur sert de matelas. Et en cela n'avons dequoy
nous mocquer d'eux, par ce que noz vieuz peres Gaullois en faisoient de
méme. & dinoient aussi sur des peaux de chiens & de loups, si Diodore &
Strabon disent vray. Mais quant au païs des Armouchiquois & Iroquois, il
y a plus grande moisson à faire pour ceux qui sont poussez d'un zele
religieux, par ce que le peuple y est beaucoup plus frequent, & cultive
la terre, de laquelle il retire un grand soulagement de vie. Vray est
qu'il n'entendent pas bien la façon de faire le pain, n'ayant les
inventions des moulins, ni du levain, ni des fours; ains broye son blé
en certaine façon de mortiers' & l'empâte au mieux qu'il peut pour le
faire cuire entre deux pierres echauffées au feu: ou bien rotit ledit
blé en epic sur la braise, ainsi que faisoient les vieux Romains, au
dire de Pline. Depuis on trouva le moyen de faire des gateaux souz la
cendre: & depuis encore les boulengers trouverent la façon des fours. Or
ces peuples cultivans la terre sont arretés, ce que les autres ne sont
point, n'ayans rien de propre, tels qu'estoient les Allemens au temps de
Tacite, lequel a décrit leurs anciennes façons de vivre. Plus avant dans
les terres au dessus des Armouchiquois sont les Iroquois peuples aussi
arretés, par ce qu'ilz cultivent la terre, d'où ils recueillent du blé
mahis (ou Sarazin) dés fèves, des bonnes racines, & bref tout ce que
nous avons dit du pays desdits Armouchiquois, voire encore plus, car par
necessité ilz vivent de la terre, estans loin de la mer. Neantmoins ils
ont un grand lac d'etendue merveilleuse, comme d'environ 60 lieuës, à
lentour duquel ils sont cabannés. Dans ledit lac il y a des iles belles
& grandes, habitées desdits Iroquois, qui sont un grand peuple, & plus
on va avant dans les terres plus on les trouve habitées: si bien que
(s'il faut croire les Hespagnols) au pays dit le Nouveau Mexique bien
loin pardela lesdits Iroquois, en tirant au Suroïst, il y a des villes
baties, & des maisons à trois & quatre etages: méme du bestial privé:
d'où ils ont appellé une certaine riviere _Rio d las vaccas_, la riviere
des Vaches, pour y avoir veu en grand nombre paturer le long de la
riviere. Et est ce pays directement au Nort à plus de cinq cens lieuës
du vieil Mexique, avoisinant, comme je croy, l'extremité du grand lac de
la riviere de Canada, lequel (selon le rapport des Sauvages) a trente
journées de long. Je croiroy que des hommes robustes & bien composés
pourroient vivre parmi ces peuples là, & faire grand fruit à
l'avancement de la Religion Chrétienne. Mais quant aux Souriquois, &
Etechemins, qui sont vagabons & divisés, il les faut assembler par la
culture de la terre, & obliger par ce moyen à demeurer en un lieu. Car
quiconque a pris la peine de cultiver une terre il ne la quitte point
aisement. Il combat pour la conserver de tout son courage. Mais je
trouve ce dessein de longue execution si nous n'y allons d'autre zele, &
si un Roy ou riche Prince ne prent cette cause en main, laquelle certes
est digne d'un royaume tres-Chrétien.

On a jadis fait tant de depenses & pertes d'hommes à la reconqueste de
la Palestine, à quoy on a peu proufité: & aujourd'hui à peu de frais on
pourroit faire des merveilles, & acquerir infinis peuples à Dieu sans
coup ferir: & nous sommes touchés d'une se ne sçay quelle lethargie en
ce qui est du zele religieux qui bruloit nos peres anciennement. Si on
n'esperoit aucun fruit temporel en ceci je pardonnerois à l'imbecillité
humaine. Mais Il y a de si certaines esperances d'une bonne usure,
qu'elles ferment la bouche à tous les ennemis de ce pays là, lesquels la
decrient afin de ne perdre la traite des Castors & autres pelleteries
dont il vivent, et sans cela mourroyent de faim, ou ne sçauroient à quoy
s'employer. Que s'il plaisoit au Roy, & à la Royne Regente sa mere, en
laquelle Dieu a allumé un brasier de pieté, prendre goust à ceci (comme
certes elle a faict au rapport de la Conversion des Sauvages baptizés
par le soin du Sieur de Poutrincourt) & laisser quelque memoire d'elle,
ou plustot s'asseurer de la beatitude des cieux par cette action qui est
toute de Dieu, on ne peut dire quelle gloire à l'avenir ce lui seroit
d'estre la premiere qui auroit planté l'Evangile en de si grandes
terres, qui (par maniere de dire) n'ont point de bornes. Si Helene mere
de l'Empereur Constantin eust trouvé tant de sujet de bien-faire, elle
eust beaucoup mieux aymé edifier à Dieu des temples vivans que tant
d'edifices de marbre dont elle a rempli la terre saincte. Et au bout
l'esperance de la remuneration temporelle n'en est point vaine. Car d'un
part le Sieur de Poutrincourt demeure toujours serviteur du Roy en la
terre que sa Majesté luy a octroyée: en laquelle il feroit le
rendez-vous & support de tant de vaisseaux qui vont tous les ans aux
Terres neuves, où ilz recoivent mille incommodités, & en perit grand
nombre, comme nous avons veu & oui dire. D'ailleurs penetrant dans les
terres, nous pourrions nous rendre familier le chemin de la Chine & des
Molucques par un climat & parallele tempéré, en faisant quelques
stations ou demeures au Sud de la grande riviere de Canada, puis aux
lacs qui sont plus outre, le dernier desquels n'est pas loin de la
grande mer Occidentale, par laquelle les Hespagnols vont aujourd'hui en
l'orient. Ou bien on pouroit faire la méme entreprise par la riviere de
Saguenay, outre laquelle les Sauvages rapportent qu'il y a une mer dont
ilz n'ont vu le bout, qui est sans doute ce passage par le Nort, lequel
en vain l'on a tant recherché. De sorte que nous aurions des épices, &
autres drogues sans les mendier desdits Hespagnols, & demeureroit és
mains du Roy le proufit qu'il tire de nous sur ces denrées: Laissant à
part l'utilité des cuirs, paturages, pecheries, & autres biens. Mais il
faut semer avant que recuillir. Par ces exercices on occuperoit beaucoup
de jeunesse Françoise, dont une partie languit ou de pauvreté, ou
d'oisiveté: ou vont aux provinces étrangeres enseigner les metiers qui
nous estoient jadis propres et particuliers, au moyen dequoy la France
estoit remplie de biens, ou lieu qu'aujourd'hui une longue paix ne l'a
encore peu remettre en son premier lustre, tant pour la raison que
dessus, que pour le nombre de gens oisifs, & mendians valides &
volontaires que le public nourrit. Entre lesquelles incommodités on
pourroit mettre encore le mal de la chiquanerie qui mange nostre nation,
dont elle a esté blamée de tout temps. A quoy seroit aucunement obvié
par les frequentes navigations: estant ainsi qu'une partie de ceux qui
plaident auroient plustot fait de conquester nouvelle terre, demeurans
en l'obeissance du Roy que de poursuivre ce qu'ilz debattent avec tant
de ruines, longueurs, solicitudes & travaus. Et en ce je repute heureux
tous ces pauvres peuples que je deplore ici. Car la blafarde Envie ne
les amaigrit point ilz ne ressentent point les inhumanités d'un qui sert
Dieu en torticoli, pour souz cette couleur tourmenter les hommes, ilz ne
sont point sujets au calcul de ceux qui manquans de vertu & de bonté
s'affublent d'un faux pretexte de pieté pour nourrir leur ambition.
S'ilz ne connoissent point Dieu, au moins ne le blasphement ilz point,
comme font la plupart des Chrétiens. Ilz ne sçavent que c'est
d'empoisonner, ni de corrompre la chasteté par artifice diabolique. Il
n'y a point de pauvres, ny de mendians entre eux. Tous sont riches,
entant que tous travaillent & vivent. Mais entre nous il va bien
autrement. Car il y en a plus de la moitié qui vit du labeur d'autrui,
ne faisant aucun metier qui soit necessaire à la vie humaine. Que si ce
païs là estoit etabli, tel y a qui n'ose faire icy ce qu'il feroit là.
Il n'ose point ici estre bucheron, laboureur, vigneron, etc. par ce que
son pere est chiquaneur, barbier, apothicaire &c. Et là il oublieroit
toutes ces aprehensions de reproche & prendroit plaisir à cultiver la
terre, ayant beaucoup de compagnons d'aussi bonne maison que lui. Et
cultiver la terre c'est le metier le plus innocent, & plus certain,
exercice de ceux de qui nous sommes tous descendus, & de ces braves
Capitaines Romains qui sçavoient domter & ne point estre domtés. Mais
depuis que la pompe & la malice se sont introduits parmi les hommes, ce
qui estoit vertu a tourné en reproche, & les fainéans sont venus en
estime. Or laissons ces gens là, & revenons au Sieur de Poutrincourt,
ains plustot à vous, Ô Royne Tres Chrétienne, la plus grande et la plus
chérie des cieux que l'oeil du monde voye en la ronde qu'il fait chaque
jour alentour de cet univers. Vous qui avés le maniement du plus noble
Empire d'ici bas. Quoy souffirrez vous de voir un Gentil-homme de si
bonne volonté sans l'employer & sans le secourir? Voulez vous qu'il
emporte la premiere gloire du monde par dessus vous, & que le triomphe
de cet affaire luy demeure sans que vous y participiés? Non, non,
Madame, il faut que le tout vous en soit rapporté, & que comme les
étoiles empruntent leur lumiere du soleil, aussi que du Roy & de vous
qui nous l'avés donné toutes les belles actions des François dependent.
Il faut donc prevenir cette gloire, & ne la céder à autre, tandis que
vous avés un Poutrincourt bon François, & qui a servi le feu-Roy de
regretable memoire vôtre Epoux (que Dieu absolve) en des affaires
d'estat dont les histoires ne font mention. En haine dequoy sa maison &
ses biens ont passé par l'examen du feu. Il ne passe point l'Ocean pour
voir le païs, comme ont fait préque tous les autres qui ont entrepris de
semblables navigations aux dépens de noz Roys. Mais il montre par
effectz quelle est son intention, si bien qu'on n'en peut point douter,
& ne hazarderez rien maintenant quand vôtre Majesté l'employera à bon
escient à l'amplification de la religion Chrétienne és terres
Occidentales d'outre mer. Vous reconoissez son zele, le vôtre est
incomparable, mais il faut aviser où se pourra mieux faire vôtre
emploit. Je louë les Princesses & Dames qui depuis quinze ans ont donné
de leurs biens pour le repos de ceux ou celles qui se veulent sequestrer
du monde. Mais j'estime (sauf correction) que leur pieté seroit plus
illustre si elle se montroit envers ces pauvres peuples, Occidentaux qui
gemissent, & dont le defaut d'instruction crie vengeance à Dieu contre
ceux que les peuvent ayder à estre Chrétiens, & ne le font pas. Une
Royne de Castille a esté cause que la religion Chrétienne a esté portée
és terres que tient l'Hespagnol en Occident: faites ô lumiere des Roynes
du monde, que par vous bientot ce monde nouveau où il n'est point encore
conneu. Or reprenant le fil de mon Histoire, puisque nous avons parlé du
voyage dudit Sieur de Poutrincourt, il ne sera point hors de propos si
apres avoir touché les incommodités & longueurs de sa navigation, qui
l'ont reculé d'un an, nous disons un mot du retour de son vaisseau. Ce
que sera bref, d'autant qu'ordinairement sont brèves les navigations qui
se font des terres Occidentales en deça hors le Tropique du Cancer. J'ay
rendu la raison de cela en mon Histoire de la Nouvelle-France, où je
renvoye le Lecteur: comme aussi pour sçavoir la raison pourquoy en Eté
la mer y est remplie de brumes en telle sorte que pour un jour serein il
y en a deux de brouillars: & deux fois m'y suis trouvé parmi des brumes
de huict jours entiers. Ceci a esté cause que ledit Sieur de
Poutrincourt renvoyant son fils en France pour faire nouvelle charge, il
a demeuré aussi long temps à gaigner le grand Banc aux Moruës depuis le
Port Royal, comme à gaigner la France depuis ledit Banc: & toutefois
depuis icelui Banc jusques à la terre de France il y a huit cens bonnes
lieuës: & de là méme jusques audit Port Royal il n'y a gueres plus de
trois cens. C'est sur ledit Banc qu'on trouve ordinairement tout l'Eté
force navires qui font la Pecherie des Moruës qu'on apporte pardeça,
lesquelles on appelle Moruës de Terre-neuve. Ainsi le fils dudit Sieur
de Poutrincourt (dit le Baron de Sainct Just) arrivant audit Banc fit
provision de viande freche, & pecherie de poisson. En quoy faisant il
eut en rencontre un navire Rochelois & un autre du Havre de Grace, d'où
il eut nouvelles de la mort lamentable de nôtre defunct bon Roy, sans
sçavoir par qui, ni comment. Mais apres eu en rencontre un autre navire
Anglois, d'où il entendit la méme chose, accusans du parricide des gens
que je ne veux ici nommer: car ils le disoient par haine & envie,
n'ayans plus grans adversaires qu'eux. En quinze jours donc ledit Sieur
de Sainct Just fut rendu dudit Banc en France ayant toujours eu vent en
poupe: navigation certes beaucoup plus agreable, que celle du
vingt-sixieme de Février mentionnée ci-dessus. Les gens du Sieur de
Monts partirent du Havre de Grace neuf ou dix jours apres le dit 26
Février pour aller à Kebec, 40 lieuës pardela la riviere de Saguenay, où
icelui Sieur de Monts s'est fortifié. Mais ilz furent contraints de
relacher pour les mauvais vents. Et là dessus courut un bruit que le
Sieur de Poutrincourt estoit peri en mer, & tout son equipage. A quoy je
n'adjoutay onques foy, croyant pour certain que Dieu l'aidera, & le fera
passer par-dessus toutes difficultez. Nous n'avons encore nouvelles
dudit Kebec, & en attendons bientot. Mais je puis dire pour la verité
que si jamais quelque chose de bon reüssit de la Nouvelle France la
posterité ne aura de l'obligation audit Sieur de Monts autheur de ces
choses, auquel si on n'eust point oté le privilege qui lui avoit esté
baillé pour la traite des Castors & autres pelleteries, aujourd'hui nous
aurions force bestiaux, arbres fruictiers, peuples & batimens en la dite
province. Car il a desiré ardamment de voir pardela les affaires
etablies à l'honneur de Dieu & de la France. Et jaçoit qu'on lui ait oté
le sujet de continuer, si ne s'est il point decouragé jusques à present
de faire ce qu'il a peu, ayant fait batir un Fort audit Kebec, avec des
logemens fort beaux & commodes. En ce lieu de Kebec cette grande &
immense riviere de Canada est reduite à l'étroit, & n'a que la portée
d'un fauconneau de large, abondante en poissons autant que riviere du
monde. Pour le pays il est beau à merveilles, & abondant en chasse. Mais
estant en pays plus froid que le port Royal, assavoir quatre vingtz
lieuës plus au Nort, aussi la pelleterie y est-elle beaucoup plus belle.
Car (entre autres) les Renars y sont noirs, & d'un poil si beau, qu'il
semble faire honte à la Martre. Les Sauvages du Port Royal y peuvent
aller en dix ou douze jours par le moyen des rivieres sur lesquelles ils
navigent préque jusques à la source, & de là portans leurs petits canots
d'écorce par quelque espace dans les bois, ils gaignent un autre riviere
qui va tomber dans ledit fleuve de Canada: & ainsi expedient bien-tot de
longs voyages: ce que de nous-mémes ne sçaurions faire en l'etat qu'est
le païs. Et par mer audit Kebec il y a dudit Port Royal plus de quatre
cens lieuës en allant par le Cap Breton. Ledit Sieur de Monts y avoit
envoyé des vaches dés il y a deux ans & demi, mais faute de quelque
femme de village qui entendist le le gouvernement d'icelles, on en a
laissé mourir la pluspart en se dechargeant de leurs veaux. En quoy se
reconoit comme une femme est necessaire en une maison, laquelle je ne
sçay pourquoy tant de gens rejettent, & ne s'en peuvent passer. Quant à
moy je seray toujours d'avis qu'en quelque habitation que ce soit on ne
fera jamais fruit sans la compagnie des femmes. Sans elles la vie est
triste, les maladies vienent, & meurt-on sans secours. C'est pourquoy je
me mocque de ces mysogames qui leur ont voulu tant de mal, &
particulierement j'en veux à ce fol qu'on a mis au nombre des sept
Sages, lequel disoit que la femme est un mal necessaire, veu qu'il n'y a
bien au monde comparable à elle. Aussi Dieu l'a il baillée _pour
compagne à l'homme, afin de l'aider & consoler:_ et le Sage dit que
_Malheureux est l'homme qui est seul, car il n'a personne que
l'echauffe, & s'il tombe en la fosse il n'a personne pour le relever._
Que s'il y a des femmes folles, il faut estimer que les hommes ne sont
poins sans faute. De ce defaut de vaches plusieurs se sont ressentis,
car estant tombés malades ilz n'ont pas eu toutes les douceurs
qu'autrement ils eussent euës, & s'en sont allez promener aux champs
Elisées. Un autre qui avoit esté de nôtre voyage, n'eut point la
patience d'attendre cela' & voulut gaigner le ciel par escalade dés le
commencement de son arrivée, par une conspiration contre le sieur
Champlein son Capitaine. Les complices furent condemnés aux galeres, &
ramenés en France. L'Eté venu assavoir il y a un an, ledit Champlein
desireux de voir le païs des Iroquois, afin qu'en son absence les
Sauvages ne se saisissent point de son Fort, il leur persuada d'aller là
faire la guerre, & partirent avec lui & deux autres François, en nombre
de quatre-vingts ou cent, jusques au lac desdits Iroquois, à deux cens
lieuës loin dudit Kebec. De tout temps il y a eu guerre entre ces deux
nations, comme entre les Souriquois & Armouchiquois: & se sont
quelquefois elevés les Iroquois jusques au nombre de huit mille hommes,
pour guerroyer & exterminer tous ceux qui habitoient la grande riviere
de Canada: comme il est à croire qu'ils ont fait, d'autant que là n'est
plus aujourd'hui le langage qui s'y parloit au temps de Jacques
Quartier, qui y fit, il y a quatre-vingts ans. Ledit Champlein avec ses
troupes arrivé là, ilz ne se peurent si bien cacher qu'ilz ne fussent
apperceuz de ces peuples, qui ont toujours des sentinelles sur les
avenües de leurs ennemis: & s'estans les uns & les autres bien remparés,
il fut convenu entre eux de ne point combattre pour ce jour là, mais de
remettre l'affaire au lendemain. Le temps lors estoit serein: si bien
que l'Aurore n'eut point plutot chassé les ombres de la nuit, que la
rumeur s'emeût par tout le camp. Quelque enfant perdu des Iroquois ayant
voulu sortir de ses rampars, fut transpercé non d'un trait d'Apollon, ou
de l'Archerot aux yeux bendés, mais d'un vray trait materiel & bien
poignant qui le mit à la renverse. Là dessus, la colere monte au front
des offensés & chacun se met en ordre pour attaque & se defendre. Comme
la troupe des Iroquois s'avançoit, Champlein qui avoit chargé son
mousquet à deux balles, voyant deux Iroquois marcher devant avec dés
panaches sur la tête, se douta que c'estoient deux Capitaines, & voulut
s'avancer pour les mirer. Mais les Sauvages de Kebec l'empecherent,
disans: Il n'est pas bon qu'ilz te voyent, car incontinent, n'ayans
point accoutumé de voir telles gens, ilz s'en fuiront. Mais retire toy
derriere le premier rang des nôtres, & puis quand nos serons prets, tu
devanceras. Ce qu'il fit: & par ce moyen furent les deux Capitaines tout
ensemble emportés d'un coup de mousquet. Lors victoire gaignée. Car
chacun se debende, & ne restoit qu'à poursuivre. Ce qui fut fait avec
peu de resistance, & emporterent environ cinquante têtes de leurs
ennemis, dont au retour ilz firent de merveilleuse fêtes en Tabagies,
danses, & chansons continuelles selon leur coutume.

[Illustration.]



[Illustration.]

                         EXTRAIT DU REGISTRE
                      DE BAPTEME DE L'EGLISE DU
                      Port Royal en la Nouvelle
                               France

                       _LE JOUR SAINCT JEHAN
                       Baptiste 24 de Juin._

1. MEMBERTOU grand Sagamos àgé de plus de cent ans a esté baptizé par
Messire Jessé Fleche Pretre, & nommé HENRY par Monsieur de Poutrincourt
au nom du Roy.

2. MEMBERTOUCOICHIS (dit Judas) fils ainé de Membertou àgé de plus de 60
ans, aussi baptizé, & nommé LOUIS par Monsieur de Biencour au nom de
Monsieur le Dauphin.

3. Le fils ainé de Membertoucoichis dit à present Louïs Membertou, àgé de
cinq ans, baptizé & tenu par Monsieur de Poutrincourt, qui l'a nommé
JEHAN de son nom.

4. La fille ainée dudit Luis àgée de treze ans aussi baptizée, & nommée
CHRISTINE par ledit Sieur de Poutrincourt au nom de Madame la fille
ainée de France.

5. La seconde fille dudit Louis àgée d'onze ans aussi baptizée, & nommée
ELIZABETH par ledit Sieur de Poutrincourt au nom de Madame la fille
puisnée de France.

6. La troisieme fille dudit Louïs tenu: par ledit Sieur de Poutrincourt
au nom de Madame sa femme aussi baptizée, nommée CLAUDE.

7. La 4e fille dudit Louïs tenuë par Monsieur de Coullogne pour
Madamoiselle sa mere, a eu nom CATHERINE.

8. La 5e fille dudit Louïs a eu nom JEHANNE ainsi nommée par ledit Sieur
de Poutrincourt au nom d'une de ses filles.

9. L 6e fille dudit Louïs tenuë par René Maheu a esté nommée CHARLOTTE
du nom de sa mere.

10. ACTAUDINECH' troisieme fils dudit Henri Membertou a esté nommé PAUL
par ledit Sieur de Poutrincourt au nom du Pape Paul.

11. La femme dudit Paul a esté nommée RENÉE du nom de Madame
d'Ardanville.

12 La femme dudit Henri a esté tenuë par le dit Sieur de Poutrincourt au
nom de la Royne, & nommée MARIE de son nom.

13. La fille dudit Henri tenuë par ledit Sieur de Poutrincourt & nommée
MARGUERITE au nom de la Royne Marguerite.

14. L'une des femmes dudit Louïs tenuë par Monsieur de Jouï pour Madame
de Sigogne, nommée de son nom.

15. L'autre femme dudit Louïs tenuë par le dit Sieur de Poutrincourt au
nom de Madame de Dampierre.

16. ARNESY cousin dudit Henri a esté tenu par ledit Sieur de
Poutrincourt au nom de Monsieur le Nonce, & nommé ROBERT de son nom.

17 AGOUDIGOUEN aussi cousin dudit Henri a esté nommé NICOLAS par ledit
Sieur de Poutrincourt au nom de Monsieur des Noyers Advocat au Parlement
de Paris.

18. La femme du dit Nicolas tenuë par ledit Sieur de Poutrincourt au nom
de Monsieur son neveu, a eu nom PHILIPPE.

19. La fille ainée d'iceluy Nicolas tenuë par le dit Sieur pour Madame
de Belloy sa niepce, & nommée LOUISE de son nom.

20. La puisnée dudit Nicolas tenuë par le dit Sieur pour Jacques de
Salazar son fils, a esté nommée JACQUELINE.

21. Une niepce dudit Henri tenuë par Monsieur de Coullogne au nom de
Madamoiselle de Grandmare, & nommée ANNE de son nom.


                            _LOUÉ SOIT DIEU._





*** End of this LibraryBlog Digital Book "Conversion des Sauvages qui ont  esté baptizés en la Nouvelle France, cette année 1610" ***

Copyright 2023 LibraryBlog. All rights reserved.



Home