Title: Yntemoca yntlacamecayo, yn tlahtoque yn teteuhctin yn ompa tlaca ypan altepetl culhuacan yhuan nican tlahtoque teteuhctin yn ipan in tlaca huey altepetl mexico tenochtitlan - Oquitlallitiaque yn tlahtoque teteuhctin culhuacan
Author: Cuauhtlehuanitzin, Domingo Francisco de San Antón Muñón Chimalpahin
Language: 
As this book started as an ASCII text book there are no pictures available.


*** Start of this LibraryBlog Digital Book "Yntemoca yntlacamecayo, yn tlahtoque yn teteuhctin yn ompa tlaca ypan altepetl culhuacan yhuan nican tlahtoque teteuhctin yn ipan in tlaca huey altepetl mexico tenochtitlan - Oquitlallitiaque yn tlahtoque teteuhctin culhuacan" ***


[Transcriber's Note: Overbars in the original are here represented by
tildes. An English translation is available in Codex Chimalpahin,
volume 2, ISBN 0-8061-2950-6.]

La decendencia y generacion de los Reyes, y Señores y naturales del
pueblo de culhuacan y tambiẽ de aqui de los Reyes y Señores. naturales
en esta grã ciudad de mexico tenochtitlan. compuesto por los Señores.
de culhuacan.

Yntemoca yntlacamecayo, yn tlahtoque yn teteuhctin yn ompa tlaca ypan
altepetl culhuacan yhuan nican tlahtoque teteuhctin yn ipan in tlaca
huey altepetl mexico tenochtitlan, Oquitlallitiaque yn tlahtoque
teteuhctin culhuacan

¶ .x. tochtli xihuitl. 670. años, ypan inyn acico yn motlallico. yn
oncan culhuacan yn huehuetque chichimeca culhuaque ye ynpan acico ye
cate yn xochmilca yn oncan calli xochmilco

¶ ix. acatl xihuitl 695. años. ypan inyn tlacat yn tepiltzin yn itoca
Nauhyotzin ye iuh cenpohualli onchiquacen xihuitl cate yn culhuaque yn
oncan culhuacan

[Left margin: .1. huehue nauhyotzin Rey.] ¶ v. calli xihuitl. 717.
años. ypan inyn motlahtocatlalli yn tepiltzin yn itoca huehue
Nauhyotzin tlahtohuani achto culhuacan ye hualconpehualti yn
tlahtocayotl ye iuh cenpohualli omeyxiuhtia y nauhyotzin yn
motlahtocatlallico. auh ye iuh nepa onpohualli onchicuexihuitl cate yn
oncan culhuacan yn huehuetque chichimeca culhuaque

[Left margin: .2. huehue nonoalcatl Rey.] ¶ iij. acatl xihuitl 767.
años. ypan in momiquillico, yn tlacatl yn tepiltzin yn itoca huehue
Nauhyotzin tlahtohuani catca achto culhuacan yn tlahtocat Onpohualli
onmatlactli ypan ce xihuitl, // Auh ça niman ipan inyn omoteneuh
xihuitl yn motlahtocatlali yn tlacatl yn huehue nonohualcatl
tlahtohuani culhuacan

[Left margin: .3. huehue yohuallatonac Rey.] ¶ iij. calli xihuitl 845.
años. ypan in momiquillico yn itoca huehue nonohualcatl tlahtohuani
catca culhuacan yn tlahtocat yepohualli oncaxtolli ypã nauhxihuitl. //
Auh çan niman ipan inyn omoteneuh xihuitl yn motlahtocatlalli yn itoca
huehue yohuallatonac tlahtohuani culhuacan

[Left margin: .4. Quetzallacxoyatzin Rey.] ¶ x. tecpatl xihuitl 904.
años. ypan inyn momiquillico tlacatl huehue yohuallatonac tlahtohuani
catca culhuacan yn tlahtocat yepohualxihuitl, auh ça niman ipan inyn
omoteneuh xihuitl yn motlahtocatlalli yn tlacatl yn itoca
quetzallacxoyatzin tlahtohuani culhuacan

[Left margin: .5. huehue chalchiuhtlatonac Rey.] ¶ vij. calli xihuitl
953. años. ypan inyn momiquillico yn tlacatl quetzallacxoyatzin
tlahtohuani catca culhuacan yn tlahtocat, ompohualli onmatlactli
xihuitl, auh çan niman ipan inyn omoteneuh xihuitl yn motlahtocatlalli
yn tlacatl yn itoca huehue chalchiuhtlahtonac tlahtohuani culhuacan

[Left margin: .6. Totepeuh Rey.] ¶ xiij. calli xihuitl. 985. años.
ypan inyn momiquillico yn tlacatl huehue chalchiuhtlahtonac
tlahtohuani catca culhuacan yn tlahtocat. cẽpohualli onmatlactli ypan
yexihuitl. auh çan niman ipan inyn omoteneuh xihuitl yn
motlahtocatlalli yn tlacatl yn itoca totepeuh tlahtohuani culhuacan

¶ viij. calli xihuitl, 993. años. ypan in motlahtocatlalli yn itoca
hueymac tlahtohuani huey tullam quin yehuatl in ompa conpehualtito yn
tlahtocayotl, ayatle catca ynin ypiltzin yn totepeuh tlahtohuani
culhuacan auh yn tetlahtocatlallito ytoca nauhyotzin yhuan yn itoca
opochtli ynin pipiltin culhuacan

¶ x. acatl xihuitl 995. años. ypan inyn oncan azcapotzalco yn
motlallico yn acico yn huehuetque chichimeca in ye motenehua
azcapotzalca yn quinhualpachotia ytoca huitzillihuitl yn chichimecatl.
iuh quihualtlahtocapouhtia yehuatl quinpixotehuac iuhquima
ynquauhtzonyo in ye cuel teyxhuihuan yn huehue teçoçomoctli
tlahtohuani azcapotzalco, auh yehuatl ynelhuayo y nohuian tlahtoque

[Left margin: .7. yc ome nauhyotzin Rey.] ¶ 2. tochtli xihuitl. 1026.
años. ypan in momiquillico yn tlacatl yn totepeuh tlahtohuani catca
culhuacan yn tlahtocat onpohualxihuitl ypan ome xihuitl. auh çan niman
ipan inyn omoteneuh xihuitl yn motlahtocatlalli ynic ome ytoca
nauhyotzin tlahtohuani culhuacan

[Left margin: .8. Quauhtexpetlatzin Rey.] ¶ ix. tecpatl xihuitl. 1072.
años. ypan in omomiquillico yn tlacatl ynic ome nauhyotzin tlahtohuani
catca culhuacan yn tlahtocat, onpohualli onchicome xihuitl, auh çan
niman ipan inyn omoteneuh xihuitl yn motlahtocatlalli yn itoca
quauhtexpetlatzin tlahtohuani culhuacan

¶ j. calli xihuitl. 1129. años. ypan in momiquillico yn tlacatl
quauhtexpetlatzin tlahtohuani catca culhuacan yn tlahtocat, onpohualli
oncaxtolli ypan yexihuitl auh ce xihuitl yn ayac tlahtocat.

[Left margin: .9. huetzin Rey.] ¶ 2. tochtli xihuitl 1130 años. ypan
in motlahtocatlalli yn tlacatl yn itoca huetzin tlahtohuani culhuacan
yhuan ynic ome ytoca nonohualcatl yteuhctlahtocauh mochiuh yn
culhuacan

¶ ix. tochtli xihuitl. 1150. años ypan in momiquillico yn tlacatl
huetzin tlahtohuani catca culhuacan yn tlahtocat cenpohualli ypan ce
xihuitl auh tlacoxihuitl yn oncactimanca

[Left margin: .10. veve achitometl Rey.] ¶ x. calli xihuitl 1151.
años. ypan in motlahtocatlalli yn tlacatl yn itoca huehue achitomecatl
tlahtohuani culhuacan

¶ iiij. acatl xihuitl, 1171. años ypan in momiquillico yn tlacatl
huehue achitomecatl tlahtohuani catca culhuacan yn tlahtocat,
cenpohualxihuitl once auh tlacoxihuitl yn oncactimãca

[Left margin: .11. Quauhtlahtonac Rey.] ¶ v. tecpatl xihuitl, 1172.
años. ypan in motlahtocatlalli yn tlacatl yn itoca quauhtlahtonac
tlahtohuani culhuacan

¶ v. calli xihuitl. 1185. años. ypan in momiquillico yn tlacatl
quauhtlahtonac tlahtohuani catca culhuacan yn tlahtocat matlactli
onnahui xihuitl auh tlacoxihuitl yn cactimanca

[Left margin: .12. mallatzin Rey.] ¶ vi. tochtli xihuitl. 1186. años.
ypan in motlahtocatlalli yn tlacatl yn itoca Mallatzin tlahtohuani
culhuacan

¶ vij. tecpatl xihuitl. 1200. años. ypan in momiquillico yn tlacatl
mallatzin tlahtohuani catca culhuacan yn tlahtocat, caxtolxihuitl, auh
nimã yn cactimanca yn quauhtlahtolloc culhuacan yn ayac tlahtocat
cenpohualli oncaxtolli xihuitl

[Left margin: .13. chalchiuhtlatonac segundo Rey.] ¶ iiij. tecpatl
xihuitl, 1236. años. ye quin ipan inyn motlahtocatlallico yn tlacatl
ynic ome ytoca chalchiuhtlatonac tlahtohuani culhuacan auh ye omito yn
çan quauhtlahtolloc cenpohualli oncaxtolli xihuitl

[Left margin: .14. Quauhtlix Rey.] ¶ xiij. calli xihuitl 1245. años.
ypan in momiquillico yn tlacatl ynic ome chalchiuhtlatonac tlahtohuani
culhuacan catca yn tlahtocat, matlacxihuitl auh çan niman ipan inyn
omoteneuh xihuitl yn motlahtocatlalli yn tlacatl yn itoca quauhtlix
tlahtohuani culhuacan

[Left margin: .15. yohuallatonac Rey.] ¶ vij. tecpatl xihuitl. 1252.
años. ypan in momiquillico yn tlacatl quauhtlix tlahtohuani catca
culhuacã yn tlahtocat, chicuexihuitl, auh çan niman ipan inyn
omoteneuh xihuitl yn motlahtocatlalli yn tlacatl ynic ome ytoca
yohuallatonac tlahtohuani culhuacan

¶ j. acatl xihuitl 1259. ypan in omomiquillico yn tlacatl ynic ome
yohuallatonac tlahtohuani catca culhuacan yn tlahtocat, chicuexihuitl,
auh çan tlacoxihuitl yn oncactimanca.

[Left margin: .16. tziuhtetl Rey.] ¶ 2. tecpatl xihuitl, 1260. años.
ypan in motlahtocatlalli yn tlacatl yn itoca tziuhtetl tlahtohuani
culhuacan

[Left margin: .17. xihuitl temoc Rey.] ¶ xj. calli xihuitl. 1269.
años. ypan in momiquillico yn tlacatl tziuhtetl tlahtohuani catca
culhuacan yn tlahtocat matlacxihuitl, auh çan niman ipan inyn
omoteneuh xihuitl yn motlahtocatlalli yn tlacatl yn xihhuitl temoc
tlahtohuani culhuacan

Auh nican ca ytlahtollo yn itemoca yn itlacamecayo yn tlacatl huehue
huitzillihuitl achto tlahtohuani mochiuhca yn intlan teochichimeca
mexitin yn otlipan yn oncan chapoltepec yn ayemo nican tenochtitlan yn
oquic innenemillizpan ynic huallatiaque yn oquic hualmotlatlallitiaque
ynic yecoque yn ixquichtĩ yn izqui tlayacatl yn huehuetque yn azteca
mexitin teoculhuaque chicomoztoca

Auh ynic nohuian hualnentiaque yn mexica huehuetque teochichimeca ynic
ompa hualquizque huallehuaque aztlan teoculhuacan ynic huallollinque
yhuan ynic oncan quiçaco quinehuayan chicomoztoc yn huehuetque auh
niman oncan acico yn itocayocã tzonpanco auh yn iquac oncan acico in
yehuantin huehuetque azteca mexitin yquac oncan tlahtocati yehuatl
chane yn itoca tlahuizcalpotonqui teuhctli cenca quintlaçotlaque yn
oncan mexica quinnamictiaya yn comitl yn caxitl, oncan motlallico yn
mexica oncan nauhxiuhtique yn mocehuique

Auh oc cequintin huehuetque quitotihui yn iquac acico tzonpanco mexica
yquac ompa tlahtocati yn xaltocan yn itoca tlahuizcalteuhctli
tlahtohuani auh oncatca ce ypiltzin ytoca Ompanteuhctli. auh in
yehuantin inyn tlahuizcalteuhctli mochi yc ompa aciticatca yn intlal
yn inquaxoch yn tzonpanco auh yn ipiltzin yn itoca onpanteuhctli, nimã
ye quitohua ye quilhuia yn ittatzin yn tlahtohuani tlahuizcalteuhctli
quilhui notecuiyohe tlahthoaunie ma xinechmocahuilli ma niquimitta
aquique ynin ye cate totlalpan niman quihto yn tlahtohuani
tlahuizcalteuhctli ca ye qualli tla xiauh tla xiquimitta aquique yn
oncan omotlallico, niman onya yn tzonpanco, yn tlahtocapilli
ompanteuhctli niman ye yntlan nemi yn mexica cexiuhti yntlan auh niman
ye mononotza in mexica ye quihtohua aquin totlan nemi motollinia
mexica ye ma ce xicmacacan yn amochpoch yn ompanteuhctli yc niman
quimacaque ce yn imichpoch mexica, auh niman ye mopilhuatia oncan ye
tlacati ynic ce cihuatzintli ytoca chimallaxotzin, ynic ome [struck
out: ytoca] ya yehuatl yn itoca huehue huitzillihuitl, yniquey ytoca
tozpanxotzĩ ynin cihuatzintli xocoyotl yqu imeyxtin ypilhuã yn
ompateuhctli

Auh yn achto otiquinteneuhque huehuetque yn iuh quitotihui yn iquac
oncan acico tzompanco yn mexica ye omito oncan nauhxiuhtique auh yn
iquac onca tzonpanco huellehuaque yn huallolinque mexica quin iquac
quinhualmacac quilmach ye ce ychpoch yn tlatohuani tzonpãco yn
tlahuicalpotonqui teuhctli niman yaque tiçayocan yn mexica quihuicaque
yn ichpoch tlahuizcalpotonqui teuhctli yehuatl quichiuh yn huehue
huitzillihuitl, o yhui ỹyn quimaxallotihui tlahtolli yn huehuetq̃. auh
macihui yn omoteneuh occan tlahtolli yn maxaliuhtica yece necoc campa
quineltilitihui yn huehuetque ca yxhuiuhtzin yn tlahuizcalteuhctli
tlahtohuani yn huehue huitzillihuitl, yn aço cihuayotica yn anoço
oquichotica yn yeço ytlapallo,

Auh ynic ompa tzonpanco huallehuaque yn huallolinque mexica auh yn
itoca tozcuecuextli yehuatl hualquauhtlahtotia yn intlan mexica
yehuatl quinhualyacan ynin quin otlica tlacat auh onpohualxihuitl ynic
teyacan yn quauhtlato oncan quilpillique yn ixiuh yn tecpayocan ynic
hualyatiaque mexica auh yn onmic tozcuecuextli, niman ye mononotza yn
mexica ypan yn huehue huitzillihuitl ynic quitlahtocatlallizque auh
niman huallaque oncan motlallico ỹ mexica yn itocayocan amalinalpan yn
azcapotzalco oncã quezquixiuhtique

¶ j. tecpatl xihuitl, 1272. años. ypan inyn omononotzq̃ mexica
chichimeca huehuetque niman ye contlahtocatlallia yn huehue
huitzillihuitl ynin huell achto yntlahtocauh mochiuh yn mexica ynic
ompa huallaque aztlan ynin quitlahtocatlallique ça ye oc õcan yn
amallinalpan azcapotzalco, auh çan ye ypan inyn omoteneuh xihuitl. j.
tecpatl, niman huallaque yn oncan chapoltepec ynahuac yn itocayocan
techcantitlan oncan nauhxiuhtique yn mexica yn motlallique oncan
nauhxihuitl tlahtocat yn huehue huitzillihuitl

¶ 2. calli xihuitl 1273. años. ypan inyn huel mellahuac ynic oncan
motlallico mexica yn techcantitlã yn inahuac chapoltepec ynic ompa
huallehuaque amallinalpan azcapotzalco, auh oncan in nauhxiuhtique yn
mexica

¶ v. tecpatl xihuitl 1276. años. ypan in oncan nauhxiuhtique yn
techcantitlan yn mexica auh çã ye ypan inyn omoteneuh xihuitl yn oncã
hualmiquanique atlacuihuayan mexican oncã Motlallico oc no
nauhxiuhtique oncan ye ynpan acico yn oncan chaneque çan no chichimeca
oquinmocniuhtitacico yn mexica oncan oquicuitacico yn atlatl auh yn
quitemacac yn atlatl ytoca xohuitzil quinmacac yn mexica chichimeca
auh ynin mexica yn iquac oacico ynpan in yehuantin oc cẽtlamantin
oncan yeppa chanonoque quin yehuantin yn mexica oquintocayotitacico
atlatl cuihuayancalque ypampa yn oncan quicuitacico ye omoteneuh yn
atlatl oncan nauhxihuitl tlahtocat yn huehue huitzillihuitl
chichimecatl

¶ ix. tecpatl xihuitl 1280. años. ypan inyn ic onmiquanique
chapoltepec yn mexica azteca oncan onehuaque yn atlacuihuayan çan ye
oc yehuatl yntlahtocauh mochiuhtihuitz yn mexica ỹ huehue
huitzillihuitl chichimecatl ye quin ye iuh nepa chicuexihuitl
motlahtocatlalli ynic õcan motlallico chapoltepec auh yc oncan
cenpohualxiuhtique yn catca mexica yn chapoltepec

[Left margin: .18. coxcoxtli Rey.] ¶ x. calli xihuitl. 1281. años.
ypan in momiquillico yn tlacatl yn xihuitl temoc tlahtohuani catca
culhuacan yn ipiltzin acxoquauhtli yn tlahtocat matlactli omey
xihuitl. // auh çã niman ipan inyn omoteneuh xihuitl yn
motlahtocatlalli yn tlacatl yn itoca coxcoxtli tlahtohuani culhuacan
yn iquac yn ye quin ye nepa ce xihuitl oncan cate chapoltepec yn
mexica, auh yn amaq̃meque chichimeca yn atonaltzin chichimeca
teuhctli. yhuan tliltecatzĩ chichimeca yaotequihua, yhuan yn tlacatl
quahuitzatzin tlayllotlac teuhctli, tlahtoque, ye quin oiuh ye
matlactli omey xihuitl cate nepa yn icpac tepetl Amaqueme ynic acico
yn omoteneuhque tlahtoque chichimeca yn iquac onmotlahtocatlalli
coxcoxtli, auh ynin tlahtohuani coxcoxtli yeyntin quinchiuh ypilhuan
ynic ce ytoca huehue teçoçomoctli eleltzin, ynic ome ytoca huehue
acampichtli yniquey cihuatzintli amo huel momati yn itoca // Auh yn
huehue teçoçomoctli helleltzin ce ychpochtzin quichiuh yn oncan
culhuacan yece amo huel momati yn itoca cihuapilli ynin
quihuallitlanique yn tenanca atlauhteca chalca yn intlahtocauh yn
itoca ylloncueytl atlauhtecatl teuhctli quimocihuauhti ompa tlahcatito
yntech quiz ynic ome ytoca ytzquauhtzin atlauhtecatl teuhctli
teyxhuiuh oncã culhuacã

¶ vj. tochtli xihuitl. 1290. años. ypan in quicauh yn itlahtocayo yn
illoncueytl atlauhtecatl teuhctli, tlahtohuani catca atenco tenanco
atlauhtlan chalco, Ynin ypiltzin yn huehue ytzquauhtzin atlauhtecatl
teuhctli, auh yn itech catca tlahtocayotl yn oncan atenco chalco
caxtolli omey xihuitl, auh ypan inyn omoteneuh yn vj. tochtli xihuitl,
yquac quimixiptlahti yn illoncueytl quicahuilli yn itlahtocayo yn
ipiltzin ynic ome ytoca ytzquauhtzin atlauhtecatl teuhctli mochiuh
ynin piltontli yn iquac macoctlahtocayotl ynin ye cuel yccaton yn
tlacatl coxcoxtli tlahtohuani culhuacan, auh çan ye ypan inyn
omoteneuh yn chiquacen tochtli xihuitl ynic õcan onehuac atenco chalco
yn piltontli yn itzquauhtzin atlauhtecatl teuhctli ynic ya ynic
motlallito yn ompa amaquemecan yn
toltecatzaqualti[struck out: tlan]tenanco [struck out: atlauh]tlan
ompa tlahtocatito ynic ompa onmiquanique tenanca atlauhteca yn ipan in
omoteneuh xihuitl ompa ypan acito yn ĩtlalmaceuhcauh yn tlacatl yn
itoca quahuitzatzĩ tlayllotlac teuhctli huel yehuatl
yntlahtocatachcauh yn tenanca chalca auh çan no ypan inyn xihuitl
omoteneuh yn tlahtohuani ylloncueytl atlauhtecatl teuhctli ompa ya yn
cohuatl ichan yn aculhuacan yc cenya / auh yn iquac ypan in ye quin ye
matlacxihuitl tlahtocati yn tlacatl coxcoxtli yn oncan culhuacan / Auh
ye matlactli once xihuitl oncan cate chapoltepec yn huehuetque mexica
chichimeca ye iuh caxtolli onnahui [superscript: xivitl] quinpachohua
yn tlahtocauh yn huehue huitzillihuitl, chichimecatl yn iquac ypan in
omoteneuh xihuitl,

¶ 2. acatl xihuitl. 1299. años. ypan in toxiuhmolpilli, auh ypan inyn
omoteneuh yn. 2. acatl xihuitl ynic oncan cenpohualxiuhtique
chapoltepec ynic oncan cate yn mexica chichimeca auh ye tlacoxiuhtica
yn ipan in omoteneuh. 2. acatl xihuitl, yn onmiquanique mexica yn oncã
ytocayocan yn acucolco, oncan quinyaotlatalhuique oncan
yaoyahualloloque yn mexica huehuetq̃ çan ic mocemitohua chapoltepec
oncan quinyaoyahualloque ynic nahualpolliuhque yn mexica ynchimal
tlacuecuepaltica yn nahuapoliuhque auh in yehuantin mexica yn oquic
ayemo quimatia in tleyn ninpan ye chihualloz otetlatlanique achtopa in
ye tlachia in ye teytta, oneyaochichihualloc in mexica ye tetlatlania
oquintlatlaniq̃ yn ixquichtin yn cenhueytlalhuacque yn tepaneca yhuan
yn xaltocameca [struck out: yn quinnanquillique] oquimilhuique campa
anmohuica yn amochintin ohuanmoyaochichiuhque niman yc
oquinnanquillique oquitoque yn ixquichtin tepaneca yhuan yn
xaltocameca ca ompa tihui tiyaoquiçazque yn xochmilco, ancaço ye
oncontlalli ytlahtol yn azcapotzalco tlaca yn xochmilco. yhuan
culhuacan yhuan yn xaltocan yn ca mocẽtlallique yn ca mononotzque yn
mexica chichimeca ynic quinnahualpollozque yn iuh niman ynpã
quichiuhque mexica, niman õcan yaoyahualloque yn acucolco oncan
chimaltlacuecuepaltica nahualpolliuhque yn huehuetque mexica oncã
temac tlanque ynic nauhcampa ohuicalloque yn mexica ynic quinpeuhque
auh yn oncã omoteneuh yn acucolco, oncan ynpan motlalli yn mexica
huehuetque ynic quilpillizquia yn ĩxiuh, auh ayemo huel quilpillique
yn inxiuh yn oncã acucolco ypampa yn yaoyotl oncã ynpan mochiuh, auh
yhuan yn oncã omoteneuh yn acucolco oncan quimoquentique yn mexica yn
quitocayotia amoxtli, auh ynic oncan quinyaoyahualloque mexica yn
acucolco ye omtio, yehuantin yntlachichihual mochiuh yn tepaneca yhuã
culhuaque yhuan yn xochmilca yhuan xaltocameca yn quinnamicque mexica
chichimeca yn oncan chapoltepec ynic pehualloque ynic mitohua oncan
nahualpoliuhque yn acucolco, oncan qui macique oncan quimonehualtique
yn quinhuicaque [struck out: yn quinhuicaque] culhuacan yn tlahtohuani
huehue huitzillihuitl chichimecatl, yn achto yntlahtocauh catca mexica
ynehuan huicoque yn ichpoch ytoca azcatl xochtzin yhuan oc ce
cihuatzintli yn huicoc ytoca tzihuacxotzin, yhuan yn ihueltiuh
huitzillihuitl yn itoca chimallaxotzin, yqu in nahuixtin huicoque yn
culhuacã auh yn oc ce yteyccauh huitzillihuitl, huicoc xaltocan yn
itoca tozpanxotzin ynin cihuapilli amo mic çan quiquixtique, auh yn
oqu ixquich yntlapal quichiuhque yn amo huel temac huetzque huehuetque
mexica yn tlayxnamicque yaoyotica yn oncan yn acucolco chapoltepec
nahuintin ynic ce ytoca tzihuactli, ynic ome ytoca ce acatzin, yinquey
ytoca huitzin ynic nahui ytoca contzin,

auh yn omotocateneuhque yn huehue huitzillihuitl yn ihuan ychpoch yn
azcatl xochtzin yn ihuan yhueltihuatzin chimallaxotzin yn ihuã oc ce
cihuatzintli yn iquin nahuixtin yn acucolco oncan quimonehualtique yn
quinhuicaque ompa culhuacan çan pepetlauhtiaque çan nima ayoc tle
yntech huetztia yntlahquen auh yehuatl yxpan quinhuicaque yn
tlahtohuani coxcoxtli yxpan quinquetzato ynic quimittaz yn
omalchihualloc huahue huitzillihuitl yhuã yn oc cequintin
cihuatzitzinti, auh yn oquic ayemo quimonaxitiaya yxpan coxcoxtli,
nimã conilhuito ohuanoc yn huitzillihuitl yn intlahtocauh mexica yn
oquicac niman quihto yn coxcoxtli ca ye qualli ma yciuhca
xoconmictitihuetzican yntla oquimonaxitico

Auh in yehuatl yn huehue huitzillihuitl ynic quĩhuicaque yn ichpoch
cenca quitlaocoltia yn atle ma ytlatzin ytech huetztia quilhuitacic yn
tlahtohuani coxcoxtli yn huitzillihuitl tlahtohuanie ma ytlahtzin
xicmotlaocollili y nochpochtzin, auh niman quinanquilli quilhui camo
nicia çan iuh yaz. yn mochpoch auh yn oquimonittac, yn tlahtohuani
coxcoxtli yn huitzillihuitl, yn ihuan ychpoch yn ihuan yhueltihuatzin
chimallaxotzin yhuan tzihuacxotzin yc niman yxpan yn intlacatecollouh
in diablo yn quimoteotiaya culhuaque yn quimonmictique yn huehue
huitzillihuitl yhuan yn oc cequintin omoteneuhque cihuatzitzinti auh
yn ixquichcauh tlahtocat huehue huitzillihuitl cenpohualli onchicuey
xihuitl, oiuhqui yn ynic nahualpolliuhque ynic chimaltlacuecuepaltica
polliuhque yn azteca mexitin chichimeca huehuetque ynic quiytztinenque
ynic quimaceuhque tlalli,

Auh oc cequintin huehuetque yn iuh quitotihui yn iuh
qui[struck out: mic]mictique huehue huitzillihuitl quihto yn
tlahtohuani coxcoxtli quinahuati ynic ome ytoca achitometl yhuan yn oc
cequintin pipiltin culhuaq̃ quimilhui ynin tla xoconmictiti yn
huitzillihuitl, ma ompa tlamapan oztoc yn huixachtecatl ymapã
xocõmictiti, yn tachitometl ca totlacauh auh yn oconmictito conilhuito
yn coxcoxtli niccauhtzine ca otoconmictito yn huitzillihuitl, ca ye
qualli quihto yn coxcoxtli ca yc ticpopollohua yn huitzillihuitl
cayocaque ytlaquillohuan yezque, yn iquac ypan in mictilloc
huitzillihuitl, ye iuh nepa caxtolli omey xihuitl tlahtocati yn
coxcoxtli tlahtohuani culhuacan

Auh çan ya yehuatl niman ipan inyn omoteneuh ỹ 2. acatl xihuitl 1299.
años. in ye oiuh huicoque huehue huitzillihuitl, yhuan yn oc cequintin
yn culhuacan quinmictito

[A page or more is missing here.]

Ynic ce ytoca macuilxochitzin ynic ome cihuatl ynin cihuapilli amo
momati yn itoca. quihuallitlan quimocihuahuati yn quauhpopocatzin
tlahtohuani coyohuacan yehuantin oquinchiuhque oncan otlacatque
omentin ynpilhuan ynic ce ytoca Don hernando ce tochtzin tlahtohuani
catca cuyohuacan auh ynin vmpa momiquillito yn huey mollan yn ihquac
vmpa quinhuicaya mochintin tlahtoque yn Marques del valle.

Auh ynic ome ypilhuan quauhpopocatzin ytoca Don Juan de guzman
ytztollinqui ynin yehuatl oquitlamiltico oytech tzonquiçaco yn
tlahtocayotl cuyohuacan. auh ynin tlahtohuani Don Juan ytztollinqui yn
quexquichtin ytech oquizq̃ ypilhuan tel tlacpac ye teneuhticate
mochintin, auh çã yehuatl nican toconnextia yn iuh nican mexico
tlacamecayoticate. yn tlahtocatlacamecayotica

Auh yn oc ce omotocateneuh yn ipiltzin acamapichtli tlahtohuani
tenochtitlan. yn itoca ytzcohuatzin. ynin çan no tlahtohuani
tenochtitlan. ynin quichiuh ce ypiltzin ytoca Teçoçomoctli. ynin
tlahtocapilli. quin icel yuhqui ytoca mochiuh ynin tocaytl yn nican
tenochtitlan. auh ynin omotocateneuh teçoçomoctli. ayc otlahtocat. yn
tenochtitlan çan tlaçopilli catca. auh yehuatl [superscript:
oquinchiuhtia] yn eyntin tlahtoque. tenochtitlan. ynic ce ytoca
tiçocic. ynic omeytoca Ahuitzotl. yniquey ytoca Axayaca ynin ça
xocoyotl. auh ye achto yn otlahtocat. auh çate yn otlahtocatque yn
omotocateneuhque ytiachcahuan yn tiçocic yhuan Ahuitzotl.

Auh yn omotocateneuh tlahtohuani Axayacatzin oquinchiuh omentin
ypilhuan ynic ce ytoca Moteuhcçoma xocoyotl. huey tlahtohuani ypan
acico yn españolesme ynin yehuatl quinnamic ynic ome ypilhuan
axayacatzin ytoca cuetlahuatzin achtopa tlahtohuani catca yn ompa
ytztapallapan auh çatepan çan nauhpohualilhuitl yn ontlahtocatico
nican tenochtitlan yn oyuh momiquilli ytiachcauhtzin Moteuhcçomatzin
xocoyotl.

Auh yn omotocateneuh Ahuitzotzin tlahtohuani tenochtitlan. yn conitlan
yn quimocihuahuati tlatilolco cihuapilli ytoca tecapãtzin ynin
ychpochtzin yn epcohuatzin tlahtocapilli tlatilolco. auh yn
ahuitzotzin yn inehuan tecapãtzin yehuantin in oquichiuhque oncan
otlacat çan icel yn quauhtimoctzin tlahtohuani tenochtitlan yhuan
tlatilolco. ynin yehuatl yn quilpique españolesme. yn ihquac poliuh
mexicayotl tenochcayotl. yn ipan ylhuitzin S. tipolito. martyr. yn
ipan yc 13. agosto. de 1521. años. auh çatepan ompan momiquillito. yn
huey mollan ompa quinpilloque yehuan yn Don Pº tetlepanquetzatzin
tlahtohuani tlacopan yehuatl ompan quintlatzontequilli yn Don fernando
cortes marques del valle Ytztlacatlahtoltica. yquac mochintin in vmpa
quinhuicac yn tlahtoque. ynin tlahtolli ytech tlaquixtilli yn bintula
quimocahuilitiuh Don Alonso ximenez culhuacan chane Auh yz izquintin
vmpa otlahtocatque culhuacã nican tocateneuhticaticate ynic ce

Ynic ce ytoca achitometl

Ynic ome ytoca acxoquauhtli

Yniquey ytoca coxcoxtli

Ynic nahui ytoca huehue acamapichtli

Ynic macuilli ytoca xihuitl temoc

Ynic chiquacen ytoca acamapichtli. achto tlahtohuani mochiuh yn
tenochtitlan—

Ynic chicome ytoca nauhyotl teuhctlamacazqui. ynin yehuatl
quitlanillito yn mexica chichimeca yn acamapichtli ynic otlahtocatico
tenochtitlan. yehuatl quihualmacauh. quihuallihua ynic quihualhuicac
yllancueytl cihuaplli

Ynic chicuey ytoca Acaltzin—

ynic 9. ytoca xilomãtzin ynin ytech hualcotontica yn tlacamecayotl
culhuacan

ynic 10. ytoca tlahtolcaltzin ynin oc ceppa ytech onpeuh yehuatl y
tlacamecayotl culhuacan

ynic ii. ytoca teçoçomoctli ynin yehuatl yn ipan acico españolesme

ynic 12. ytoca pitzotzin

ynic 13. ytoca Don diego tiçaatzin moteuhcçoma

ynic 14. ytoca Don Balthasar toquezquauhyotzin

Achitometl tlahtohuani culhuacan quichiuh ce ypiltzin ytoca
acxoquauhtli çan no tlahtohuani mochiuh yn culhuacan ynin quinchiuh
omentin ypilhuan ynic ce ytoca coxcoxtli, tlahtohuani culhuacan ynic
ome ytoca xihuitl temoc tlahtohuani culhuacan

Auh yn coxcoxtli tlahtohuani culhuacan oquinchiuh omentin ypilhuan
ynic ce ytoca huehue acamapichtli tlahtohuani culhuacan ynic ome ytoca
huehue teçoçomoctli ynin amo momati campa yn tlahtocatito ynin
tlahtolli ytech oquiz yn bintula quimocahuilitiuh tlacatl catca Don
miguel sanchez ytzcactzin S. Sebastian atzaqualco chane catca





*** End of this LibraryBlog Digital Book "Yntemoca yntlacamecayo, yn tlahtoque yn teteuhctin yn ompa tlaca ypan altepetl culhuacan yhuan nican tlahtoque teteuhctin yn ipan in tlaca huey altepetl mexico tenochtitlan - Oquitlallitiaque yn tlahtoque teteuhctin culhuacan" ***

Copyright 2023 LibraryBlog. All rights reserved.