Home
  By Author [ A  B  C  D  E  F  G  H  I  J  K  L  M  N  O  P  Q  R  S  T  U  V  W  X  Y  Z |  Other Symbols ]
  By Title [ A  B  C  D  E  F  G  H  I  J  K  L  M  N  O  P  Q  R  S  T  U  V  W  X  Y  Z |  Other Symbols ]
  By Language
all Classics books content using ISYS

Download this book: [ ASCII | HTML | PDF ]

Look for this book on Amazon


We have new books nearly every day.
If you would like a news letter once a week or once a month
fill out this form and we will give you a summary of the books for that week or month by email.

Title: A «San Francisco» - Un atto
Author: Di Giacomo, Salvatore, 1860-1934
Language: Italian
As this book started as an ASCII text book there are no pictures available.
Copyright Status: Not copyrighted in the United States. If you live elsewhere check the laws of your country before downloading this ebook. See comments about copyright issues at end of book.

*** Start of this Doctrine Publishing Corporation Digital Book "A «San Francisco» - Un atto" ***

This book is indexed by ISYS Web Indexing system to allow the reader find any word or number within the document.



  SALVATORE DI GIACOMO


  TEATRO


  'O VOTO--A «SAN FRANCISCO»
  'O MESE MARIANO--ASSUNTA SPINA
  QUAND L'AMOUR MEURT....


  LANCIANO
  R. CARABBA, EDITORE
  1910


  PROPRIETÀ LETTERARIA

  _Le copie non firmate dall'Autore sono dichiarate
  contraffatte_


  Questo volume, per le Compagnie Drammatiche e Comiche,
  deve essere considerato come manoscritto, da non
  potersi cedere nè rappresentare senza regolare
  permesso dell'Autore. (_Art. 14 del Testo unico, 17
  settembre 1882_).



                            A «SAN FRANCISCO»

                                 UN ATTO



  PERSONAGGI


  GIOVANNI ARCIETTO
  PEPPE PAZZIA, _camorrista_
  DON GENNARO _'o cusetore_
  LUIGIELLO, _ragazzetto tredicenne_
  RAFELE _'o masterasciello_
  CICCIARIELLO SPINA
  FEDERICO _'o pittore_
  TOTONNO BATTIMELLE
  DON PEPPE _'o siciliano, carceriere_
  Tre _secondini_

La scena ha luogo in un camerone del carcere di _San Francesco_, in
Napoli, intorno al 1850.


SCENA PRIMA

  La tela si leva lentamente. Quando è a metà del
  palcoscenico s'ode una voce interna cantare
  malinconicamente da un altro camerone.

  _Rafele_ e _Cicciariello_, seduti sulle tavole di un
  letto, giocano a carte e fumano.

  _Federico 'o pittore_ e _Totonno_ seggono sulle tavole
  di un altro letto: il secondo stende il braccio destro
  denudato e il primo glie lo va tatuando con un ago e
  col nerofumo. Il ragazzo _Luigiello_, accosto ad essi,
  osserva curiosamente l'operazione.

  _Don Gennaro 'o cusetore_ è occupato a scrivere, con
  la matita, de' numeri in un libriccino. Siede sulle
  tavole del primo letto a sinistra dello spettatore.

  Steso sul suo letto, col capo poggiato sui materassi
  ravvoltolati, _Peppe Pazzia_ dorme. Sotto al suo letto
  è una brocca, tra un fiasco di vino e un paio di
  scarpe.

  È sera. Tutti tacciono.


LA VOCE INTERNA

    _A San Francisco_
      _mo' sona 'o risveglio,_
      _chi dorme e chi veglia,_
      _chi fa nfamità!..._

LA VOCE INTERNA DI UN CARCERIERE

Silenzio!... (_e al tempo stesso s'ode un romore come di porta alla
quale si batta violentemente_).

PEPPE

(_al romore si sveglia di soprassalto e leva la testa guardando,
spaventato, intorno a sè_):

Chi è?... Ch'è stato?!...

DON GENNARO

(_senza levarsi, mettendo in saccoccia il libriccino dei suoi numeri_)

Nu' v'appaurate, 'on Peppenié. Chillo è Totonno Sarcenella ca s'è miso a
fa 'a soleta letania dint' 'o cammarone appriesso. É miezo pazzo e fa
sempe chesto, 'a notte e 'o juorno.

PEPPE

(_si leva dal letto irritato, nervoso e s' accosta a don Gennaro_)

Quann'è ddimane ca scennimmo 'a passiggiata int' 'o curtile, nun sia pe
cumanno, me l'avite nzignà.

DON GENNARO

A chi?

PEPPE

(_serio, le mani in saccoccia_)

A stu Totonno Sarcenella.

DON GENNARO

'O vulite canoscere? (_si leva. Il ragazzo passa a guardare i
giocatori_).

PEPPE

Lle voglio di' ca m'ha dda fa 'o favore, quanno io sto durmenno, nun ha
dda cantà cchiù.

DON GENNARO

Quanno state durmenno?

PEPPE

Pricisamente.

DON GENNARO

Nun ha dda cantà?!...

PEPPE

Pricisamente.

DON GENNARO

Scusate, 'on Peppenie'... e chillo comm' 'o ssape? Ll'avite dà vuie
ll'urario... E po'... v'aggio ditto... chillo s'è miezo scemunito...

PEPPE

Nu' ve capacita?

DON GENNARO

(_appaurato_)

A me?... Comme nun me capacita?... Vuie cumannate e io ve servo.

PEPPE

Datemmillo sulamente a canoscere... ca po' ce penzo io... (_torna a
sedere sulle tavole del suo letto_).

CICCIARIELLO

Scopa!

RAFELE

Sango d' 'a morte!... N' ato asso!

CICCIARIELLO

Scopa! So' fora!

RAFELE

Aspè!... Comme si' fora?... (_al ragazzo_) Guaglió', fatte cchiú llà!...
'A che te si' accustato cca bbicino nun so' stato cchiù buono 'e fa na
carta!... Aíze, vattenne!

CICCIARIELLO

Vattenne!... (_lo spinge, brutalmente_).

LUIGIELLO

(_tornando accanto a Totonno_)

E io che ve faccio?

TOTONNO

(_al ragazzo_)

E ched'è? Mo sì benuto 'a chesta parte?... E bbì si ce fa fa 'o
spezziale!... Ah!... Federi!... (_urlando pel dolore_) Tu mme
struppie!...

FEDERICO

Mo!... Aspetta... è fenuto...

PEPPE

(_a don Gennaro, levandosi_)

C' 'ore saranno?

DON GENNARO

Saranno passate 'e sette e meza: mo aggio ntiso dà 'a voce a chillo d'
'e lupine... (_una pausa_) 'On Peppenié, ve mparo na cosa. Pe ve fa
capace a buie, 'o rilorgio d' 'e ccarcere so' chille che banno vennenno
p' 'a via. Abbarate bene: 'a matina, quanno sentite... (_e fa un fischio
lungo e modulato_).

FEDERICO

(_dal suo letto, imitando la voce del caffettiere_):

'O cafettiere...e...e...e...re!

DON GENNARO

Chist'è isso. 'O cafettiere!... E songo mmerz' 'e seie e nu quarto.
Cchiù tarde passa chillo cu 'e pizze: «C' 'o fungetiello e 'alice!»
(_imita la voce e la cadenza_). E songo l'otto. Mmerze l'unnece, nu poco
cchiù nu poco meno... «Cumme volle 'a patana, cumme volle!» (_c. s._) E
a n'ato ppucurillo, sotto meziuorno... «Pe chi tene appetito e ha
faticato... 'a marenna!...»

TOTONNO e FEDERICO

(_dal loro letto, a distesa e forte_)

«'A marenna!...»

PEPPE

E bravo! Diceno buono ccà dinto ca vuie site n'ommo assignato e priciso.

DON GENNARO

È buntà vosta. Contro 'e merete mieie cca mme vonno bene tutte quante.

PEPPE

Venite cca, assettateve. (_siede sul letto e don Gennaro siede anch'egli
sulle stesse tavole_) Tenite pe fumà?

DON GENNARO

'A pippa 'a tengo... (_la cava_).

PEPPE

Ah, be'... (_si fruga_).

DON GENNARO

Ma è bacante...

PEPPE

'O tabacco v' 'o desse semp'io... Favorite, (_gli dà tabacco da una
borsetta_).

DON GENNARO

E io ve ringrazio.

(_Pausa. Peppe carica la sua pipa: l'altro la sua_).

PEPPE

(_pensoso_)

Diciteme na cosa...

DON GENNARO

(_seguitando a caricar la pipa_)

Dicite.

PEPPE

Sapisseve... riscifrà... comme si fosse nu suonno ca mm'aggio fatto?

DON GENNARO

Eh!... mo vedimmo... (_cava un fiammifero_) Na vota 'a smorfia e
ciert'ate libbre 'e cunziquenza 'e tenevo ccà dinto... (_col fornello
della pipetta si tocca in fronte_). Ma mo... nu poco 'e guaie, nu poco
l'aità, nu poco... Basta, jate dicenno...

CICCIARIELLO

(_a Rafele, gridando_)

E mò tuorne a cuntà comme vuo' tu!...

RAFELE

So' tre punte o no?!...

CICCIARIELLO

(_urlando più forte_)

So' ddì punte!

PEPPE

(_si volta, minaccioso_)

Nu poco 'e silenzio! (_i giocatori tacciono; Peppe si rivolta a don
Gennaro_) Dunque... pe ve fa capace a buie... io stevo comme si fosse
int'a na cantina 'a Sanità...

DON GENNARO

(_accende il fiammifero_)

Be'...

PEPPE

Stevo io e nn'ati quatto o cinche cumpagne d' 'e mieie... e ghiucavemo
'o tuocco...

DON GENNARO

Be'... (_accende la pipa e fuma_).

PEPPE

Quanto... tutte nzieme... mme pare comme si fosse c' 'o peretto d' 'o
vino se fosse rutto...

DON GENNARO

Scasuarmente?

PEPPE

Accussì mme pare... (_cerca di ricordarsi_)... Già... scasuarmente...
Basta, nun è stato peretto rutto c'aggio visto scorrere 'o vino ncopp'
'a tavula comme si se fosse scatasciata na votta. Io dicevo: Ma ched'è,
chesto scorre sempe? E tutto stu vino 'a do' esce?... E chello scurreva,
scorreva e ghingheva tutt' 'a cantina... e se faceva cchiù notte, e se
stutaveno 'e lume a uno a uno... 'E cumpagne mieie... nun 'e bedevo
cchiù... mme sentevo nfonnere 'e piede... 'e gamme... tutt' 'o cuorpo...
e 'o vino... scurreva, scurreva sempe... e mm' arrivava m' pietto...
(_agitato, quasi tremante_) Io... vulevo chiammà int' 'o scuro e... nun
putevo chiammà... 'a voce mme veneva meno... mme mancava 'o sciato...
e... chellu vino saglieva, saglieva... m' arrivava 'nganna, me sentevo
affucà... (_si leva, emozionato, con le mani alla gola, gli occhi
stralunati. Totonno s'accosta e interroga con gli occhi don Gennaro.
Luigiello, a bocca aperta, impiedi, ascolta anch'egli con molta
attenzione_).

DON GENNARO

Chiano chiano... Accarmateve...

PEPPE

(_dopo un silenzio_)

Tuccateme nu poco sta mano... (_gli stende la destra, tremante_).

DON GENNARO

(_tastando quella mano_)

Avite raggione. Ve site fatto friddo... (_a Totonno, voltandosi_)
Tutt'affetto 'e neveratura... (_Pausa. Peppe si passa la mano sulla
fronte_). Venimmo a nuie... Assettateve... (_Peppe siede_). Sti cumpagne
vuoste ca steveno cu buie int' 'a cantina...

PEPPE

Scumparettero...

DON GENNARO

Nu mumento... Dico accussì: v'allicurdate buono quant'erano?

PEPPE

V' 'aggio ditto... quatto o cinche...

DON GENNARO

Nu mumento. Pricisate buono... Quatto? O cinco? Vedite... Ricurdateve...

PEPPE

(_cercando di risovvenirsi_)

Aspettate... mme pare... cinco... Sì... cinco.

DON GENNARO

Va bene, (_come parlando a se stesso, e a voce alta_). Cinco... 'A
mano... E... diciteme n'ata cosa...

PEPPE

Dicite...

DON GENNARO

Steveno a mmano deritta o a mmano mancina d' 'a tavula?

PEPPE

(_indica a destra_)

Steveno 'a ccà...

DON GENNARO

A mmano deritta... Va bene,... sissignore... E vuie ve sentiveve
stregnere nganna?...

PEPPE

E pecchesto mme so' scetato una botta e mme so' menato d' 'o lietto...

DON GENNARO

Mo'... Va bene... Ho capito tutto... Cinco... 'a mano deritta... na mano
c'afferra... (_si leva, lentamente_).

PEPPE

(_emozionato_)

E... tutto stu vino?

DON GENNARO

Russo... Vino russo... ovè?...

PEPPE

(_accenna di sì col capo_)

DON GENNARO

Stu vino russo... ca scurreva...

PEPPE

(_turbato_)

Mbè?...

DON GENNARO

(_diventato serio, gli prende la mano, gli si accosta quasi faccia a
faccia e gli dice sottovoce_)

Vo' di'... sango, 'on Peppenié!

(_Si scosta. Luigiello gli ha dato una strappata alla giacca_).

PEPPE

Comme?... (_turbatissimo_) Sentite!...

RAFELE

(_che in questo ha guardato per lo spioncino_)

A posto!... A posto!...


SCENA SECONDA

TRE SECONDINI E DETTI

  La porta s'apre con un romore di chiavistelli. Entrano
  i tre secondini. I carcerati si sberrettano, si
  allineano davanti ai letti come in atteggiamento
  militare e rimangono muti. Il tatuato _Totonno_ se ne
  sta con le braccia sul dosso: _Rafele_ ha nascosto le
  carte. _Peppe_, impiedi anche lui, rimane pensoso, con
  gli occhi a terra. La porta si richiude.

  Il 1º secondino va al muro e lascia scendere in mezzo
  alla camera la lanterna: rimane accosto al muro per
  tirarla su quando sarà accesa.

  Il 2º secondino accanto al 3º secondino aspetta che la
  lanterna discenda. Scesa che è il 2º secondino si
  fruga in saccoccia.


2º SECONDINO

(_voltandosi attorno, ironico_)

Pe cumbinazione... nisciuno 'e vuie tene nu fiammifero?

DON GENNARO

(_premuroso_)

Pronte 'e fiammifere! (_li porge al 2º secondino che accende la
lanterna_) 'On Errì!... Vogliamoci bene!...

2º SECONDINO

Eh! E bedimmece spisso!... (_al 3º secondino_) Nun tuculià! (_accende la
lanterna_).

3º SECONDINO

Io nun me sto muvenno. (_al 1º secondino_) Tira ncoppa.

(_La lanterna accesa risale e si ferma. Il 1º secondino annoda la fune a
un chiodo. Poi comincia a battere con un ferro sulle inferriate della
finestra e s'indugia a guardare per essa nella via_)

2º SECONDINO

(_al 1º secondino_)

Espò?... E che se dice?... Ce vulimmo sta ccà?...

1º SECONDINO

(_scendendo dal suo sgabelletto_)

Stevo guardanno int' 'a cantina 'e don Vicienzo. Illuminazione a
grand'imprese e sunature preparate...

(_Peppe presta attenzione_)

2º SECONDINO

Sarrà figliata 'a mugliera.

1º SECONDINO

'On Errì, ce sta nu piezzo 'e lignammo d' 'a gelosia, ca se n'è
caduto...

2º SECONDINO

Ne parlammo a ghiuorno. (_al 3º secondino che va facendo la rivista
sotto i letti_) Nuvità?...

3º SECONDINO

Zero.

(_I secondini s'avviano alla porta_)

DON GENNARO

(_al 2º SECONDINO_)

'On Errì... (_il 2º secondino si ferma e si volta_) Quanto ve sottometto
na prighiera...

2º SECONDINO

Che te manca?

DON GENNARO

Vedite... 'on Errì... Chiste 'e cumpagne mieie nun se vonno fa 'o
mal'anemo e abbóccheno tutto cosa n'cuoll'a me...

2º SECONDINO

(_burbero e impaziente_)

Jammo! Nun me fa perdere tiempo!...

DON GENNARO

'On Errì, ccà simmo sette indivirule e tenimmo se' liette.

2º SECONDINO

E che buo'?

DON GENNARO

Comme, che boglio?...

2º SECONDINO

Quante site?

DON GENNARO

Sette cape.

2º SECONDINO

E a n'ato ppoco ne vene n'ata e site otto.

RAFELE

Salute! (_ai compagni_) Signori mieie, avite ntiso? Mo vene n'ato
passaggiero!

2º SECONDINO

(_al 1º secondino_)

Jammo, Espo'!... (_si avviano_).

RAFELE

Nu mumento!... Ma comm'è?... Chesto nu' sta bene!...

FEDERICO

Ma comme se ntenne? Ce cuccammo a dduie a dduie?

TOTONNO

Io mme metto a rapporto!

FEDERICO

E che ne cacce? Chisse non te risponneno manco!

RAFELE

Fanno chello che bonno lloro!

CICCIARIELLO

Chesto nu' sta bene!

RAFELE

E contro 'o revulamento!

TOTONNO

È na schifezza!

FEDERICO

Nce avimmo fa sentì! Signori mieie...

TOTONNO

A rapporto! A rapporto!

RAFELE

Nun 'o vulimmo!

FEDERICO

Nun ha dda trasì!... (_Vocìo, romore alto e confuso di voci che
protestano_).

2º SECONDINO

(_gridando anche lui_)

Gue'!... Oh!... E ched'è 'o fatto?!... Quaccuno 'e vuie vulesse scennere
abbascio 'e ssigrete?... (_minaccioso. Silenzio profondo_) 'O carcere è
chisto e nun c'è che fa! Pe stanotte arrangiateve. Quann'è dimane chi
nun è cuntento se mettesse a rapporto, (_a' suoi compagni che hanno
riaperta la porta_). Avanti! (_escono. La porta si richiude col solito
romore_).


SCENA TERZA

  All'uscita dei secondini i carcerati si raggruppano
  tutti sul davanti della scena. Un silenzio.


RAFELE

Avite ntiso?... Che bulimmo fa?

FEDERICO

E c'avimmo fa? Ccà si fossemo tutte uno amorcunzente ce saparriamo
revulà 'e n'ata manera. Che buo' fa?... Ce vo' 'a sciurdezza.

TOTONNO

Pe cunto mio mme dichiaro 'a mo. Fosse pure Tore 'e Criscienzo ha dda fa
festa! Int' 'o lietto mio nun' 'o voglio! (_guardandosi il braccio
denudato_) Caspeta!... Federì... chisto m'abbruscia ancora!...

DON GENNARO

E che tiene ncopp' 'o vraccio?

FEDERICO

'On Gennà, ll'avimmo fatto nu risignetto. Senz'offesa ccà stanno 'e
maste d' 'e pugneture!

TOTONNO

E over'è... (_a don Gennaro_) Liggite. (_Tutti osservano, meno Peppe che
se ne sta in disparte e fuma_).

DON GENNARO

(_a cui Totonno presenta il braccio, leggendo_)

«La ronna è ingannatricio.» Bravo! E stu pugnale che bene a di'?

FEDERICO

La surisfazione per riflesso della vendetta!

DON GENNARO

Bravo! (_Che bella rocchia 'e galantuommene ca sta ccà dinto! _) (_al
ragazzo che mangia del pane_) Guaglió, mo te ne faie n'ato ppoco?

LUIGIELLO

Io tengo famma!

DON GENNARO

E te si' mmiso n'ata vota ncopp' 'o lietto mio?

(_gli si accosta_).

RAFELE

(_avvicinandosi a Peppe, rimasto seduto sul letto_)

'On Peppenié, che se dice? Ve veco 'e malumore...

PEPPE

Niente... Comme si' asciuto?

RAFELE

Aggio perzo... Avite ntiso 'o secundino?

PEPPE

Aggio ntiso. Dice ca mo ce n'allogge a n'ato.

RAFELE

E addo' 'o mettimmo?...

DON GENNARO

(_al ragazzo_)

Posa ccà!

LUIGIELLO

(_piagnucoloso_)

Io ll'aggio truvato!

DON GENNARO

Posa ccà! Mo te ceco n'uocchio! (_Rafele si accosta ad essi_) S' ha
stupetiato 'o muccaturo mio 'a miez' 'e matarazze...

RAFELE

(_al ragazzo_)

Posa! Miette ccà!... (_s'impadronisce del fazzoletto_) Mo vedimmo qua
vota te faccio scennere abbascio 'a nfermaria!

DON GENNARO

(_a Luigiello_)

Ma comme te pare? Vaie p' 'a ratta pure ccà dinto?

RAFELE

(_al ragazzo_)

Pe sta vota t' 'a passo liscia. N'ata vota te faccio nu mierco! (_mette
il fazzoletto in saccoccia_).

DON GENNARO

'On Rafilú'...

RAFELE

(_al ragazzo_)

Essì! Ccà 'e guagliune ce mancaveno! Te si' mmiso a fa 'o palatino pure
ccà dinto!...

DON GENNARO

'On Rafè...

RAFELE

(_a Luigiello, minaccioso_)

Aíze sti scorze 'a terra! (_gli tira un calcio_).

DON GENNARO

'On Rafè... Per semplice ricordo...

RAFELE

Va bene', 'on Gennà, aggio capito... Comme se dice? Chi ringrazia esce
r'obbligo... A rimettere!...

DON GENNARO

Ma... vedete... io...

RAFELE

(_gli batte sulla spalla, con aria di protezione_)

A rimettere.

DON GENNARO

(Sepultus est).

(_S'ode di fuori un fischio prolungato_)

PEPPE

(_sorpreso, s'alza_)

Nu poco 'e silenzio!... (_Tutti tacciono. Si ode un secondo fischio. Tra
sè, sorpreso_) Nunziata!... E che sarrà?

RAFELE

(_accostandosi a lui_)

Che d'è neh, 'on Peppenié?

PEPPE

(_pensoso_)

A chest'ora?... Totò?...

TOTONNO

Sto ccà.

PEPPE

Vuo' dà n' uocchio 'a porta?

TOTONNO

Pronto.

PEPPE

E si vide venì a quaccheduno...

TOTONNO

Nu sternuto. Nun ce penzate (_va allo spioncino_).

RAFELE

(_a Peppe_)

Che se dice?

PEPPE

(_traendolo da parte_)

È Nunziata ca m' ha fatto siscà... Certo m'ha dda di' quacche cosa...
(_porge uno scannetto a Rafele_) Saglie... guarde mmiez' 'a strata...
(_Rafele sale sullo scannetto e guarda dalla gelosia_) Nce affiure?

RAFELE

Nun beco niente... Aspettate... llà... rimpetto... dint' 'a cantina 'e
don Vicienzo...

(_Musica di chitarre e mandolini dalla strada: accordi che precedono la
canzone. La musica seguita sempre durante il dialogo sulla scena_).

PEPPE

(_emozionato, a Rafele_)

Chi ce sta?...

RAFELE

'A nnammurata vosta... cu Gennarino «'o pastore» e cierti sunature...

TOTONNO

(_dalla porta_)

Eccì! (_si scosta dalla porta_).

PEPPE

Scínne! (_a Rafele, che scende. I carcerati tornano per un momento
accanto ai loro letti_).

2º SECONDINO

(_da fuori, parlando per lo spioncino_)

Battimelle!

TOTONNO

Presente!

2º SECONDINO

Dimane scendete a parlatorio... Viene il vostro avvocato.

TOTONNO

Sissignore. (_il secondino s'allontana_) È passato... (_guardando per lo
spioncino_) Se n'è gghiuto...

PEPPE

(_a Totonno_)

Nun te movere 'a lloco. (_sale allo scanno e fischia_).

DON GENNARO

(Rumores fugge!) (_s'acconcia il letto e vi si stende sopra_).

(_Una voce femminile canta, difuori_)

LA VOCE, SULLA MUSICA

    _Ajemmè, che pena ca tengo a stu core!_
      _Sta int' 'e cancelle il mio beno nzerrato!_
      _So' binte juorne ca sta carcerato!_
      _So' binte juorne ca stongo a penà!_

PEPPE

(_a Totonno_)

Tu tiene mente?

TOTONNO

Nun mme movo.

LA VOCE FEMMINILE

    _Luntanamente sta voce e stu canto_
      _A chi mme sente paresse lamiento!_
      _T'arraccumanno, guaglio' statt'attiento!_
      _C'appriparato nu schianto te sta!_

PEPPE

(_a Rafele_)

Che ddice?

RAFELE

Mme pare comme si fosse n'avvertimento.

UNA RAUCA VOCE MASCHILE

    _Amice belle!_
      _Se salutano 'e giuvene annurate_
      _'e sti cancelle!..._

PEPPE

(_a Rafele_)

Saluta! (_Rafele fischia_).

LA VOCE MASCHILE

    _Anelle, anelle!_
      _So' servitore 'e st'ommo affezziunato_
      _ca mm'ha siscato!_
      _Bonanotte 'e signure 'e sti cancelle!..._

(_Una distesa: la musica s'allontana, muore a poco a poco. Pausa.
Totonno si scosta dalla porta_).

DON GENNARO

(_'E signure..._ ca simmo nuie!)

PEPPE

(_a Rafele_)

Si te rico ca nun aggio capito niente nun te rico buscia...

RAFELE

A me mme pare n'avvertimento... Nisciuno ve vo' male?

PEPPE

(_pensoso_)

E che saccio? (_siede sulle tavole del suo letto. A Rafele che s'accosta
al suo_) Che faie? Te cucche?

RAFELE

Tengo nu poco 'e relore 'e capo... (_rassetta il letto_).

FEDERICO

(_dal fondo, presso al suo letto_)

Neh, chi s' 'a pigliata 'a pippa mia?

TOTONNO

Sta sotto 'o lietto. (_accostandosi a don Gennaro che scrive in un
libretto, col lapis, seduto sul letto_) 'On Gennà, qua è 'o nummero?

DON GENNARO

'O quarantuno a morte. Si mme riesceno cierte revulette ca sto facenno,
te voglio fa vedé io chi è don Gennaro. Tiene mente ccà: 'a semmana
passata fiura 'e sette su tutta la linea... (_restano a parlare
sottovoce e a guardare nel libro_).

PEPPE

(_pensoso_)

N'avvertimento?... E che po' essere?...

FEDERICO

A posto! A posto!...


SCENA QUARTA

DON GIOVANNI, DON PEPPE «'O SICILIANO», IL 3º SECONDINO E DETTI

  Aperta la porta don _Peppe_ spinge dentro _don
  Giovanni_. I carcerati si allineano, squadrando
  quest'ultimo con sospetto e curiosità.


DON PEPPE

(_sulla soglia, a don Giovanni_)

Trasiti, don.... cumme vi chiamati. Truvativi u puosto, spugghiativi e
curcativi.

DON GIOVANNI

Mme dispiace 'e v'incumudà. Aggio lassato 'a mappetella abbascio,
ncopp'a nu scanno...

(_Al suono della sua voce Peppe Pazzia si volta, sorpreso: don Giovanni
gli volge le spalle_)

DON PEPPE

Bravu! Bonu cuminciamo!

DON GIOVANNI

Ve cerco scusa...

(_Peppe Pazzia s'alza_)

DON PEPPE

E iu uora vi servu. Uora 'a vai a pigghiu. (_esce_)

(_Don Giovanni guarda la porta che si chiude, poi si volta e si trova
faccia a faccia con Peppe Pazzia _)

DON GIOVANNI

(_sbalordito_)

Tu!...

PEPPE

(_non meno sorpreso_)

Vuie! Don Giuvà!...

DON GIOVANNI

Tu'... cca' dinto!... Peppe Pazzia!...

PEPPE

'On Giuvanne!... Vuie mmiez'a nuie!...

(_Un silenzio, durante il quale i due si guardano come non credendo a se
stessi. Don Giovanni è al colmo dell'emozione, ma cerca
padroneggiarsi_).

DON GIOVANNI

'E visto?... So' benuto int' 'a cummertazione!

PEPPE

C'avite fatto?!...

DON GIOVANNI

C'aggio... fatto?... (_lo guarda come se gli volesse leggere dentro
nell'anima. Lo sforzo ch'egli fa per parere indifferente è chiaro_) Pò'
t' 'o ddico... E tu?...

PEPPE

(_spallucciando_)

M'hanno pigliato pe suspetto... pe causa 'e nu richiaramento...
Assettateve... (_trae nel mezzo della scena una scranna. Don Giovanni
siede, come spossato_) Signori mieie! (_i carcerati si fanno avanti_) Pe
revula vosta e cu rispetto 'e tutta 'a cummertazione, v'appresento
st'amico d' 'o mio.

(_Don Giovanni si alza e si toglie il berretto e saluta. Tutti si
sberrettano_).

RAFELE

(_sberrettandosi_)

Pe parte 'e tuttu quante se saluta cu duvere.

PEPPE

É n' ommo ca se mmereta tutte 'e riguarde pussibbele e avite fa comme si
fosse i' stesso. (_Don Giovanni ascolta, sorridendo, ironico_)
Ntennimmece buono: stu signore nun pava uoglio p' 'a lampa, se po'
scegliere 'o pizzo che bo', e si vo' rialà a quaccheduno riala
schittamente a chi lle fa 'o lietto. Ce sta nisciuno c'ha dda fa
usservazione?

RAFELE

(_si fa avanti, solenne_)

Sta mmordo bene.

(_Ciascuno torna al suo letto_)

PEPPE

Dunque... 'On Giuva', ccà state int' 'a casa vosta.

DON GENNARO

(E ha fatto stu bello quatto 'e maggio!)

DON GIOVANNI

(_a Peppe_)

Ve ringrazio... E mo?...

PEPPE

Mo?... Nn' 'o bberite? Ce cuccammo. Tenite suonno?

DON GIOVANNI

Niente.

PEPPE

Embè... si vulite viglià, vigliammo. Aggio durmuto fino a mo e nun tengo
suonno manco io. Si premmettete ve faccio cumpagnia.

DON GIOVANNI

E... 'o carceriere?

PEPPE

È amico. (_strizzando l'occhio_) Mo che bene a purtà 'a mappatella lle
mmuccammo quaccosa 'e renare e stammo cchiù sicure. Nu' se' carrì,
chest'è tutto...

DON GIOVANNI

(_lacera la fodera della giacca e ne cava denaro_)

Chest'è 'a muneta.

PEPPE

Vedite... è na murtificazione!... Sta muneta l'avesse caccià semp'io...
Ma... comme se dice...

DON GENNARO

(_A rimettere_).

PEPPE

Quanno ascimmo a' llibertà...

TOTONNO

(_dalla porta_)

Sta venenno 'on Peppe.

PEPPE

(_a don Giovanni_)

Quartiateve 'a chella parte.


SCENA QUINTA

DON PEPPE E DETTI


DON PEPPE

(_a don Giovanni, brusco_)

A vui!... Favuriti... chista è 'a mappatedda. (_glie la getta sul
letto_).

PEPPE

Don Pe', na parola. (_lo trae da parte: i carcerati si fanno in fondo
alla scena_) Ce sta st'amico mio... (_indica con l'occhio don
Giovanni_).

DON PEPPE

(_grave_)

Be'.

PEPPE

Mo è trasuto...

DON PEPPE

'U saccio.

PEPPE

Nun tene suonno.

DON PEPPE

E c'aiu a fari?

PEPPE

(_sottovoce_)

Si premmettete... veglia... rummane vestuto...

DON PEPPE

C'ha dda vigghiari! S'ava a curcari! L'amico... mo' è trasuto... nun
tene suonno... Ma che mme cunti? Tu a chi vuo' fari ncuitari?

PEPPE

E sentite...

DON PEPPE

Se jssi a curcari! Ccà nu' sta 'a casa suia e particularità 'un si nni
fannu! (_fa per andarsene_).

PEPPE

(_più piano_)

Ce steva nu se' carrì...

DON PEPPE

(_voltandosi_)

C'hai dittu?

PEPPE

Aggio ditto... ce steva nu se' carrì nuovo nuovo...

DON PEPPE

Nn'arzari 'a voci! (_si guarda intorno. I carcerati hanno compreso e
fingono di occuparsi a cose loro, guardando sott'occhi_) Vuoi mi
pigghiano pe chiddu ca nun sugno? (_sottovoce_) Dammi. (_Peppe gli dà il
denaro_) Picciuotti, 'a santanotti a tutti! (_esce_).

TUTTI

(_sberrettandosi_)

Santanotte.


SCENA SESTA

  _Don Giovanni_ apre la «mappatella» e ne cava un
  fazzoletto, qualche sigaro, un paio di ciabatte che
  mette a terra sotto un letto. I carcerati cominciano a
  buttarsi sui letti. _Peppe_ rifà il suo.


LUIGIELLO

(_canta, lamentoso_)

    _Aggio fatto n'ato penziero:_
      _arrubbanno nun voglio ì cchiù!_
      _Vaco sempe carcerato,_
      _e 'a casa 'e mamma nn' 'a veco cchiù!..._

RAFELE

(_dal suo letto_)

Totò, aiuteme a fa stu lietto!

TOTONNO

(_che si va spogliando_)

Nun te pozzo servì. M'abbruscia 'o vraccio.

      _L'orologio del carcere suona le ore. Una voce
      lontana, nel silenzio: «All'erta sentinella!» Un'altra
      voce: «All'erta sto!» e quindi, fioche, due altre:
      «All'erta sto!»._

DON GIOVANNI

(_è rimasto in piedi sul davanti della scena. Ha cavato un sigaro e fa
per spezzarlo. Peppe vede l'atto. Fa segno a don Giovanni di sostare.
Ficca la mano nel suo materasso, ne cava un coltello corto e glielo
porge. Don Giovanni, macchinalmente, prende l'arma. Gli balena poi in
volto come un pensiero improvviso. Egli guarda il coltello e sorride,
feroce. Taglia il sigaro e nasconde il coltello nella manica, poi offre
metà del sigaro a Peppe che gli si è ravvicinato_).

PEPPE

(_sedendo sulla scranna_)

Dunque?!...

DON GIOVANNI

Dunque.... (_siede_). Aggio fatto 'o guaio, nun c'è che fa!... (_pausa_)
Tu mo vuo' sapé pecché sto ccà dinto... È naturale... (_pausa_)
Siente... io avarria stà ccà dinto 'a paricchio tiempo!... Sì!... È
n'anno, quase, c' 'a vita mia s'è perduta, è fenuta, è addeventata nu
martirio! È n'anno ca nun trovo cchiù arriccietto!... Ca mme so'
cagnato! E 'a chill'ommo buono e faticatore ch'ero primma, mme so fatto
'o primmo scellarato nfamo!

PEPPE

(_sorpreso e commosso_)

'On Giuvà!... Ma comm'è pussibbele?...

DON GIOVANNI

(_amaramente_)

È pussibbele... Tant'è vvero ca sto' ccà e... mm' 'o mmereto...
Sulamente... (_sorride, ironico_) mmiez' a tanta guaie ca m'hanno
berzagliato, una furtuna aggio avuta!... Aggio avuto 'a furtuna 'e truvà
a te ccà dinto... (_gli prende la mano quasi come amichevolmente_).

PEPPE

(_sorpreso e lusingato_)

A me?

DON GIOVANNI

Embè?... Nun sì nu buono amico d' 'o mio?... Nun ce canuscimmo 'a tanto
tiempo?... (_non gli lascia la mano_).

PEPPE

(_c. s._)

Chest'è certo... n'amico fedele...

DON GIOVANNI

(_sorridendo _)

E pecchesto... mme te pozzo cunfidà... E mme puo' dà pure nu buono
cunziglio... (_sempre con la mano di lui stretta nella sua_).

PEPPE

Certamente...

DON GIOVANNI

(_guardandolo in faccia_)

Tu triemme?...

PEPPE

Io?... (_emozionatissimo_) No...

DON GIOVANNI

Dunque... Saie c'aggio fatto? (_gli lascia la mano e si leva. Peppe
resta seduto, guardandolo, interrogandolo con gli occhi spaventati_)
Muglierema mm'aveva affeso ncopp'a ll'onore, e io mme so' fatto
giustizia...

PEPPE

(_palpitante_)

'Onna Ndriana?!...

DON GIOVANNI

(_solenne_)

L'aggio accisa.

(_Peppe si leva di scatto. I carcerati scendono pian piano da' loro
letti e s'accostano, intenti_).

PEPPE

Ndriana!... Accisa!... E... quanno?...

DON GIOVANNI

Aieressera... E ched'è?... Tanto te fa mpressione?...

PEPPE

(_con un grido rauco_)

Uh! Dio! Dio!... (_tremante, balbettante, barcollante_) 'On Giuvà!...
(_lo guarda, con terrore_).

DON GIOVANNI

Siente... Assèttate... (_lo costringe a sedere sulla scranna ove siede
anche lui_). Eveno se' mise ca s' 'a ntenneva cu nu mio signore... Mme
l'ha cunfessato essa stessa, all'urdemo mumento... Tu siente?...

PEPPE

Sì... sento... (_sfinito, appena puo' parlare_).

DON GIOVANNI

(_con voce rotta_)

E mo... ch'è morta... siente... mme fa quase piatà... Fuie ngannata essa
pure!... (_sottovoce, a faccia a faccia_) Stu mio signore s'era già miso
cu n'ata!... E l'antico nnammurato 'e chest'ata femmena... ch'è na certa
Nunziata... m'ha ditto tutto cosa...

PEPPE

(_scattando_)

Ah!... Scellarato!...

DON GIOVANNI

E pecché? C' 'o canusce?...

PEPPE

No... Nun 'o canosco... nun saccio niente... (_vorrebbe alzarsi: si
fruga. Ricorda d'aver dato il coltello a don Giovanni e comprende. Fa
ancora per levarsi: don Giovanni lo trattiene. L'attenzione dei
carcerati cresce_).

DON GIOVANNI

(_tenendogli afferrato il braccio destro_)

Siente... E pecché te scuoste?...

PEPPE

(_palpitante_)

Io?... nun me scosto...

DON GIOVANNI

E pecché... te si fatto mpont' 'o scanno?...

PEPPE

Io?... No...

DON GIOVANNI

Fatte cchiù ccà.... (_Lo trae pian piano a sè_).

PEPPE

Sto ccà... nun mme movo...

DON GIOVANNI

Siente... Mme ngannava... Ndriana... 'a n'anno... E... saie cu chi?...

PEPPE

(_al colmo del terrore_)

Cu... chi?...

DON GIOVANNI

Mo nn' 'o ssaie cchiù?... (_terribile, a denti stretti_) St'amico... nun
'o saie?... (_fa scorrere il coltello dalla manica nella mano_).

PEPPE

(_con un fil di voce e tentando d'alzarsi_)

Chi?...

DON GIOVANNI

(_feroce: ha cavato il coltello_)

Chi?!... Chi?... Si' tu! (_Lo colpisce. Cadono. La scranna si rovescia.
Lottano a terra. I carcerati si precipitano da' letti_).

PEPPE

Ah!... traritore!... aiu...to!... (_rantola_).

LUIGIELLO

(_terrorizzato, impiedi sul suo letto_)

Mamma mia!... Nun l'accedite!... Nun l'accedite!...

_I carcerati fanno per avanzarsi. Don Giovanni si leva col coltello in
mano, e li affronta. Peppe è rimasto steso a terra. Romore interno di
gente che accorre._

DON GIOVANNI

Nisciuno se muvesse! 'A causa è giusta. (_indica Peppe col coltello_)
St'amico ca vedite ccà nterra m'aveva offeso ncopp'a l'onore! Mm'è
custato se' carrì... (_Entrano dalla porta che si apre in fretta, don
Peppe e i secondini. Luigiello indica don Giovanni_). Tanto valeva!...
(_Getta il coltello. È afferrato e trascinato via. Rimangono dentro nel
camerone due secondini che tengono in rispetto i carcerati_).

(_Gruppo silenzioso e terrorizzato intorno al cadavere. Rafele si china,
lo tocca, si rialza, allibito_).

_La voce di Sarcenella, come quando s'è levata la tela, dal camerone
lontano, più lenta e più triste:_

    _A San Francisco_
      _mo sona 'o risveglio,_
      _chi dorme e chi veglia,_
      _chi fa nfamità..._

_Durante il canto la tela comincia a scendere lentamente. Essa cade sul
palcoscenico alle ultime parole della strofa._

_Il gruppo dei carcerati rimane in azione muta._





*** End of this Doctrine Publishing Corporation Digital Book "A «San Francisco» - Un atto" ***

Doctrine Publishing Corporation provides digitized public domain materials.
Public domain books belong to the public and we are merely their custodians.
This effort is time consuming and expensive, so in order to keep providing
this resource, we have taken steps to prevent abuse by commercial parties,
including placing technical restrictions on automated querying.

We also ask that you:

+ Make non-commercial use of the files We designed Doctrine Publishing
Corporation's ISYS search for use by individuals, and we request that you
use these files for personal, non-commercial purposes.

+ Refrain from automated querying Do not send automated queries of any sort
to Doctrine Publishing's system: If you are conducting research on machine
translation, optical character recognition or other areas where access to a
large amount of text is helpful, please contact us. We encourage the use of
public domain materials for these purposes and may be able to help.

+ Keep it legal -  Whatever your use, remember that you are responsible for
ensuring that what you are doing is legal. Do not assume that just because
we believe a book is in the public domain for users in the United States,
that the work is also in the public domain for users in other countries.
Whether a book is still in copyright varies from country to country, and we
can't offer guidance on whether any specific use of any specific book is
allowed. Please do not assume that a book's appearance in Doctrine Publishing
ISYS search  means it can be used in any manner anywhere in the world.
Copyright infringement liability can be quite severe.

About ISYS® Search Software
Established in 1988, ISYS Search Software is a global supplier of enterprise
search solutions for business and government.  The company's award-winning
software suite offers a broad range of search, navigation and discovery
solutions for desktop search, intranet search, SharePoint search and embedded
search applications.  ISYS has been deployed by thousands of organizations
operating in a variety of industries, including government, legal, law
enforcement, financial services, healthcare and recruitment.



Home